ოპოზიცია პარლამენტში თავდაცვისა და უშიშროების კომიტეტის სხდომის მოწვევას ითხოვს

პოლიტიკა - 18:57, 24 Nov, 2015

1217

ტერორიზმის საფრთხეებთან დაკავშირებით ოპოზიცია პარლამენტის თავდაცვისა და უშიშროების კომიტეტის მოწვევას ითხოვს.

„თავისუფალი დემოკრატების“ ერთ-ერთი ლიდერის ირაკლი ჩიქოვანის განცხადებით, სახელმწიფოს კონკრეტული სამოქმედო გეგმა სჭირდება:

„ყველასთვის ნათელია უკვე, რომ ტერორიზმს არ აქვს საზღვრები და საქართველო ვერ დარჩება გამოცალკევებული ამ ყველაფრისგან და სახელმწიფოს სჭირდება კონკრეტული სამოქმედო გეგმა, იმასთან დაკავშირებით, თუ როგორ გაუმკლავდება ამ ყველაფერს.

აუცილებელია თავდაცვის და უშიშროების კომიტეტის შეკრება, არ აქვს მნიშვნელობა ღია თუ დახურული ფორმატი. ჩვენ გვექნება საუბარი იმასთან დაკავშირებით, თუ როგორ ემზადება სახელმწიფო და რას აკეთებს იმისათვის, რომ შესაძლო საფრთხეები აიცილოს თავიდან“-განაცხადა ჩიქოვანმა.

კომიტეტის სხდომის მოწვევას ითხოვენ „ნაციონალებიც“ . დავით ბაქრაძის თქმით ხელისუფლება ტერორიზმის საფრთხეს სერიოზულად უნდა მიუდგეს:

„ყველას გვესმის, რომ საფრთხე არის რეალური და ეს საფრთხე არის საქართველოსთან ძალიან ახლოს. მაგრამ უნდა შევინარჩუნოთ სიმშვიდე და ამ სიმშვიდის ფონზე ხელისუფლებამ უნდა გააკეთოს ყველაფერი, რაც ევალება. სამწუხაროდ, მე ვერ გეტყვით, რამდენად მზად არის ხელისუფლება ასეთი საფრთხეებისთვის. ჩემს ხელთ არსებული ინფორმაციით, დღეს უსაფრთხოების სამსახურების რესურსის დიდი ნაწილი კვლავ იხარჯება პოლიტიკური ოპოზიციის დევნაზე, თვალთვალზე და მასთან ბრძოლაზე. ამიტომ ხელისუფლებას მოვუწოდებ, სერიოზულად მიუდგეს ამ საფრთხეს,“ - აღნიშნა დავით ბაქრაძემ.

თავდაცვისა და უშიშროების კომიტეტის სხდომის მოწვევას მმართველი გუნდის ლიდერი, გია ვოლსკი, მხარს უჭერს. თუმცა, ოპოზიციას საკითხის დაძაბვაში ადანაშაულებს.

„რა პრობლემაა, ვერ გავიგე. რა პრობლემას ვქმნით იმისათვის, რომ უნდა მოვისმინოთ უსაფრთხოების სამსახურების ან შინაგან საქმეთა, ან ძალოვანი სტრუქტურების ინფორმაცია ღია თუ დახურულ სხდომაზე. რატომ შეიქმნა საერთოს ეს პრობლემა. თუ საჭიროა უნდა განვიხილოთ, თუ არაა საჭირო, ჩვენ არ ვართ ერთმანეთთან ისეთ დამოკიდებულებაში, რომ აუცილებლად ტელეკამერების წინ ვარჩიოთ ეს საკითხი. მე ვფიქრობ, რომ საჭიროა,“ - განაცხადა ვოლსკიმ.

პარლამენტში თავდაცვისა და უშიშროების კომიტეტის სხდომის მოწვევის აუცილებლობაზე საუბრობენ მესამე სექტორის წარმომადგენლებიც. მათი თქმით ეს, რაც შეიძლება, დროულად უნდა მოხდეს. და აღმასრულებელმა ხელისუფლებამ საპარლამენტო ფორმატში უნდა ჩააბაროს ანგარიში იმის შესახებ თუ რამდენად არიან მომზადებულნი შესაბამისი სტრუქტურები საფრთხეების თავიდან ასაცილებლად.