საქართველოს პრეზიდენტი ლატვიის საგარეო საქმეთა მინისტრ ედგარს რინკევიჩს შეხვდა. შეხვედრისას მხარეებმა საქართველოს მიერ დემოკრატიული რეფორმების სხვადასხვა მიმართულებით მიღწეულ პროგრესზე ისაუბრეს და იმედი გამოთქვეს, რომ ვიზალიბერალიზაციის შესახებ ევროკავშირის გადაწყვეტილება პოზიტიური იქნება.

საქართველოს პრეზიდენტმა და ლატვიის საგარეო საქმეთა მინისტრმა საქართველო-რუსეთის ურთიერთობებზე, ოკუპირებულ ტერიტორიებზე არსებულ ვითარებაზე ისაუბრეს. მხარეებმა რეგიონული უსაფრთხოების საკითხები და სირიაში შექმნილი ვითარება განიხილეს.

საუბარი ასევე შეეხო ორ ქვეყანას შორის არსებულ მჭიდრო და მეგობრულ ურთიერთობებს და ლატვიის პრეზიდენტის საქართველოში დაგეგმილ ვიზიტს. ლატვიის საგარეო საქმეთა მინისტრმა მზადყოფნა გამოთქვა საქართველოს მხარი დაუჭიროს ევროატლანტიკურ სივრცეში ინტეგრაციის პროცესში.