ჩვენი მთავრობის მთავარი ღირებულება არის ადამიანი

ჩვენი მთავრობის მთავარი ღირებულება არის ადამიანი - ირაკლი ღარიბაშვილი

პოლიტიკა - 13:06, 21 Nov, 2015

1752

"ექსპო-ჯორჯიაში" გლობალური კონფერენცია "ჯანდაცვის გამოწვევები 21-ე საუკუნეში: საქართველო და მსოფლიო" მიმდინარეობს, რომელსაც საქართველოს პრემიერ-მინისტრი ირაკლი ღარიბაშვილი და ფრანგი პოლიტიკოსი, დიპლომატი და ექიმი, საფრანგეთის საგარეო საქმეთა ყოფილი მინისტრი, ბერნარ კუშნერი, ესწრებიან.
როგორც პრემიერმა აღნიშნა, ბერნარდ კუშნერი საქართველოში განსაკუთრებული სტუმარია.
მისი თქმით, ქართველ ხალხს არასდროს დაავიწყდება, რომ აგვისტოს ომის დროს ბერნარდ კუშნერი მშვიდობიან მოქალაქეებთან ერთად იდგა ომის წინა ხაზზე.
"მინდა განსაკუთრებით მივესალმო განსაკუთრებულ სტუმარს ბერნარდ კუშნერს. ადამიანს, რომელიც ჩვენ ყველას კარგად გვახსოვს აგვისტოს ომის დროს ძალიან რთულ ვითარებაში როგორ იდგა მშვიდობიან მოქალაქეებთან ერთად ომის წინა ხაზზე და ინაწილებდა იმ რისკებს და საფრთხეებს, რომელიც მაშინ მომდინარეობდა როცა ბომბები ცვიოდა ჩვენს ქალაქებსა და სოფლებში, ეს ჩვენ არასდროს დაგვავიწყდება. ეს არის მისი გამბედაობის და მისი განსაკუთრებული სოლიდარობის გამოხატვა ჩვენი ხალხისა და ქვეყნის სუვერენიტეტის დასაცავად", - განაცხადა ირაკლი ღარიბაშვილმა.

საქართველოს პრემიერმა სიტყვით გამოსვლისას ხაზგასმით აღნიშნა, რომ მთავრობის მთავარი ღირებულება ადამიანი მისი სიცოცხლე და მოქალაქეების ჯანმრთელობაა.
ღარიბაშვილის თქმით, მოსახლეობის სამედიცინო მომსახურების ხელმისაწვდომობის მიზნით მთავრობამ არაერთი ნაბიჯი გადადგა.

"ჩვენი მთავრობის მთავარი ღირებულება არის სწორედ ადამიანი. მისი სიცოცხლე, ჯანმრთელობა და ჩვენ უკვე არაერთი ნაბიჯი გადავდგით იმისთვის, რომ მოსახლეობისთვის სამედიცინო მომსახურება იყოს ხელმისაწვდომი და უკეთესი ხარისხის. მინდა სიამაყით აღვნიშნო, რომ ჩვენს ქვეყანაში წარმატებით ხორციელდება საყოველთაო ჯანდაცვის სახელმწიფო პროგრამა და დღეს ყველა მოქალაქე არის უზრუნველყოფილი სამედიცინო მომსახურებით" - დასძინაპრემიერ-მინისტრმა.