"პრეზიდენტის მიმართვის უპასუხოდ დატოვება შესაძლოა პრემიერის იმპიჩმენტის საფუძველი გახდეს"

პოლიტიკა - 16:50, 20 Nov, 2015

4692

კონსტიტუციონალისტ ვახუშტი მენაბდის ინფორმაციით, მთავრობას პრეზიდენტის მიერ დასმულ საკითხებზე რეაგირებას საქართველოს კონსტიტუცია ავალდებულებს.

მისი თქმით, რეაგირების გარეშე დატოვება კონსტიტუციის დარღვევად ითვლება, რაც შესაძლოა პრემიერის იმპიჩმენტის საფუძველიც გახდეს, რადგან მთავრობის დღის წესრიგს სწორედ ის ადგენს.

„საქართველოს მთავრობის წევრებს, მათ შორის პრემიერმინისტრს აქვს ვალდებულება შეასრულოს კონსტიტუციის მოთხოვნები. საქართველოს კონსტიტუციის მიხედვით არსებობს ვალდებულება, რომ პრეზიდენტის მოთხოვნის შემთხვევაში ის მიიწვიონ მთავრობის სხდომაზე და განიხილონ ის საკითხი, რომელსაც პრეზიდენტი ითხოვს. საქართველოს პრემიერ-მინისტრი არის ის, ვინც ადგენს დღის წესრიგს და თუ ის ამ საკითხს დღის წესრიგში არ შეიტანს, შესაბამისად ის დაარღვევს კონსტიტუციას. აქ უკვე ჩნდება პრემიერის იმპიჩმენტის შესაძლებლობა და კითხვები პრემიერის მოქმედების კონსტიტუციურობასთან შესაბამისობის თვალსაზრისით“, - აღნიშნა ვახუშტი მენაბდემ.

შეგახსენებთ, პრეზიდენტის საპარლამენტო მდივანმა გიორგი კვერენჩხილაძემ განაცხადა, რომ მთავრობას 4 მიმართვა გაუგზავნეს, რომელიც რეაგირების გარეშე დარჩა. როგორც კვერენჩხილაძე ამბობს, ერთ-ერთი მიმართვა ენერგოუსაფრთხოების საკითხის მთავრობის სხდომაზე განხილვას უკავშირდება.