ამ დაცინვას მოსახლეობა საარჩევნო ყუთებთან უპასუხებს - ნადირაშვილი შსს-ს სარესტორნო ხარჯებზე

პოლიტიკა - 16:11, 20 Nov, 2015

1051

"ერთიანი ნაციონალური" მოძრაობიის ერთ-ერთი ლიდერი, ირმა ნადირაშვილი აუდიტის დასკვნაში მითითებულ, შს სამინისტროს მიერ 2013-14 წლებში რესტორანში დახარჯულ - 2 მილიონი ლარის საკმაოდ მსუყე მაჩვენებელს "ნიუპოსტთან" გამოეხმაურა.
ნადირაშვილი დარწმუნებულია, რომ ბიუჯეტის გაფლანგვის გამო ხელისუფლებას ამომრჩეველი პასუხს 2016 წლის საპარლამენტო არჩევნებზე გასცემს.
"სარესტორნო მიმართულებით ყველაზე ცნობილი მინისტრი ნოდარ ხადური იყო. მისი ფეხზე დამდგარი ციკნები საყოველთაო დაცინვის საგანი გახდა. ძალიან ვწუხვარ, რომ იმ ქვეყანაში, სადაც ადამიანებს სოციალური დახმარებები მოუხსნეს, პენსიონერებს კი პენსიას არ უზრდიან, ქვეყანაში სადაც, ჩვენი მავნებელი მთავრობის გამო მოსახლეობა შიმშილის ზღვარზეა, შს სამინისტრო აძლევს თავს უფლებას 2 მილიონი რესტორნებში და ქეიფში გაფლანგოს. ხელისუფლების ეს დამოკიდებულება ადასტურებს იმას რომ მათ არ აქვთ არანაირი შეგნება, თუ როგორ უნდა მართონ ქვეყანა. ისინი დასცინიან თავის მოქალაქეებს, დარწმუნებული ვარ რომ ეს ამომრჩევლები უუნარო ხელისუფლებას საკადრის პასუხს 2016 წელს საარჩევნო ყუთებთან გასცემენ"- აღნიშნა "ნიუპოსტთან" ირმა ნადირაშვილმა.
შეგახსენებთ, რომ სახელმწიფო აუდიტის სამსახურის უახლესი კვლევის მიხედვით, 2013 წლის განმავლობაში შს სამინისტროს ხარჯი იყო 1,859.700 ლარი, ხოლო 2014 წლის განმავლობაში - 1,082.200 ლარი. აუდიტის სამსახურის ინფორმაციით, რესტორნის მომსახურებაზე გაწეული ზოგიერთი ხარჯის შემთხვევაში გაურკვეველია სტუმრების ვინაობა და რაოდენობა. ასეთი ხარჯი, 2013-2014 წლებში, ჯამში 1 923 000 ლარს შეადგენს.