სამწუხაროა, რომ პრეზიდენტის ადმინისტრაციის მიმართვებზე მთავრობამ რეაგირება არ მოახდინა

სამწუხაროა, რომ პრეზიდენტის ადმინისტრაციის მიმართვებზე მთავრობამ რეაგირება არ მოახდინა - კვერენჩხილაძე

პოლიტიკა - 15:54, 20 Nov, 2015

1213

პრეზიდენტის საპარლამენტო მდივანი გიორგი კვერენჩხილაძე სამწუხაროს უწოდებს იმ ფაქტს, რომ მთავრობამ მათი რამდენიმე მიმართვა რეაგირების გარეშე დატოვა.

მისი ინფორმაციით, ბოლო ერთი წლის განმავლობაში პრეზიდენტის ადმინისტრაციიდან 4 მიმართვა გაიგზავნა, რომელიც ეხებოდა მთავრობის სხდომის ფორმატში მსჯელობის გამართვას.

როგორც კვერენჩხილაძე ამბობს, ერთ-ერთი მიმართვა ენერგოუსაფრთხოების საკითხის მთავრობის სხდომაზე განხილვას უკავშირდება.

„ამგვარი კონსტიტუციური მექანიზმები წარმოადგენს დემოკრატიული სახელმწიფოს ფუნქციონირების საფუძველს და მათი დაკნინება ნამდვილად არ მიუთითებს სამართლებრივი სახელმწიფოს საფუძვლების გააზრებაზე. არსებობს გონივრული ვადის, კანონის ანალოგიის პრინციპი და წელიწადზე, 10 თვეზე, 2 თვეზე მეტი ხნის წინ გაგზავნილ მიმართვებზე დღემდე ადმინისტრაციას პასუხი არ მიუღია და მათ რეაგირება არ მოჰყოლია, რაც ძალიან სამწუხაროა. ეს ნამდვილად არ მიუთითებს დემოკრატიული სახელმწიფოს საფუძვლების გააზრებაზე“, - ამბობს გიორგი კვერენჩხილაძე.