ოპერის სცენიდან პოლიტიკაში? - "მე არ ვუარყოფ, არც კის გეუბნებით, არც არას"

პოლიტიკა - 12:15, 20 Nov, 2015

2337

„საქართველოს განვითარების ფონდის“ დამფუძნებელი, ცნობილი საოპერო მომღერალი - პაატა ბურჭულაძე სასტუმრო "თბილისი მარიოტში" საკუთარი ფონდის წევრებს ხვდება. პაატა ბურჭულაძემ შეხვედრის დაწყებამდე ჟურნალისტებთან კომენტარი გააკეთა და სამომავლო გეგმებზე ისაუბრა. ბურჭულაძემ სამომავლოდ პოლიტიკურ ცხოვრებაში ჩართვა არ გამორიცხა, მან ასევე დაადასტურა, რომ ყოფილ პრემიერ ბიძნა ივანიშვილთან და „თავისუფალი დემოკრატების“ ლიდერ ირაკლი ალასანიასთან გარკვეული კონსულტაციები ჰქონდა.

„მე არასოდეს მიფიქრია, რომ გავხდებოდი ოპერის მომღერალი და ცხოვრებამ ასე ამიძულა, ამიძულა კი არა მომცა შანსი, რომ ვყოფილიყავი ოპერის მომღერალი და გამოვიყენე. არასდროს არ მინდოდა, რომ ვყოფილიყავი ქველმოქმედი, მაგრამ ცხოვრებამ შექმნა ის პირობები, რომ გავმხდარიყავი ქველმოქმედი. დღესდღეობით მე ჩამოვაყალიბე ფონდი, თუ რამე მოხდება კიდე, მე არ ვუარყოფ, არც კის გეუბნებით არც არას, თუ ცხოვრება მე მანახებს, რომ ეს არის აუცილებელი გავაკეთებ ამას“- განაცხადა ბურჟულაძემ.

ბურჭულაძემ საპრეზიდენტო კანდიდატად მის წარდგენასთან დაკავშირებითაც გააკეთა კომენტარი და აღნიშნა, რომ ის გამორიცხავს დღეს ამ თემაზე ლაპარაკს, თუმცა ბურჭულაძეს მომავალში ამის შესაძლებლობა არ გამოურიცხავს.

პაატა ბურჭულაძემ თავის საოპერო კარიერაზეც ისაუბრა და აღნიშნა, რომ მისი კონტრაქტები ამ დროისთვის გაუქმებულია.

„მე გავაუქმე დროებით, ან შესაძლოა სრულებით ყველა კონტრაქტი. ეს ფონდი ძალიან საჭიროა, მე ყვალეფერი ამ ფონდში გავცვალე.“- აღნიშნა ბურჭულაძემ.

ბურჭულაძემ მომავალ თანამშრომლობაზეც ისაუბრა და აღნიშნა, რომ ითანამშრომლებს ყველასთან ვისთვისაც საქართველოს ბედი და საქართველოს მოქალაქეები მნიშვნელოვანია. ამასთანავე ბურჭულაძემ განაცხადა, რომ მას კონსულტაციები სხვადასხვა პოლიტიკურ ძალებთანაც ჰქონდა.