ხარვეზები გვქონდა, რადგან სამი წელი სულ საარჩევნო პროცესში ვიმყოფებოდით

ხარვეზები გვქონდა, რადგან სამი წელი სულ საარჩევნო პროცესში ვიმყოფებოდით - კალაძე "ქართულ ოცნებაზე"

პოლიტიკა - 15:16, 19 Nov, 2015

1356

„ქართული ოცნება-დემოკრატიული საქათველო“ ქვეყნის მასშტაბით საოლქო კონფერენციების ჩატარებას აგრძელებს.
"ქართული ოცნება-დემოკრატიული საქათველოს“ გენერალურმა მდივანმა კახა კალაძემ და აღმასრულებელმა მდივანმა ირაკლი კობახიძემ საოლქო ორგანიზაციების კონფერენცია იმერეთში, ხონის მუნიციპალიტეტში გახსნეს.
"ჩვენ დავიწყეთ მთელი საქართველოს მასშტაბით, საოლქო კონფერენციების ჩატარება. დღეს, ვიმყოფებით იმერეთში, ხონის მუნიციპალიტეტში.კონფერენციები იმერეთის კიდევ ორ მუნიციპალიტეტში გაიმართება: თერჯოლასა და ხარაგაულში, სადაც ავირჩევთ პარტიის თავმჯდომარეებს და ბიუროს წევრებს.თქვენ იცით, რომ საოლქო ორგანიზაციების კონფერენციები ასევე გაიმართა აჭარასა და გურიაში.
სამომავლოდ პარტიის თავმჯდომარეების არჩევის პროცესში პრემიერ-მინისტრი ირაკლი ღარიბაშვილი მიიღებს მონაწილეობას და ეს პროცესი აქტიურად გაგრძელდება.
თქვენ იცით, რომ ჩვენ აქტიურად დავიწყეთ მუშაობა პარტიის გაძლიერებაზე, პარტიის სტრუქტურულად ჩამოყალიბებაზე, ამ მიმართულებით ჩვენ გარკვეული პრობლემები, ხარვეზები გვქონდა, რადგან სამი წლის მანძილზე სულ საარჩევნო პროცესში ვიმყოფებოდით, თუმცა დღეს გვაქვს რეალური შესაძლებლობა იმისა, რომ პარტია სტრუქტურულად გავაძლიეროთ და მოვემზადოთ 2016 წლის საპარლამენტო არჩვენებისათვის.“ - განცხადა ხონის მუნიციპალიტეტში კონფერენციის დასრულების შემდეგ კახა კალაძემ.