ერთადერთი საფრთხე, რაც ვიზა-ლიბერალიზაციას ემუქრება, მთავრობის ქმედებებია

ერთადერთი საფრთხე, რაც ვიზა-ლიბერალიზაციას ემუქრება, მთავრობის ქმედებებია - ბაქრაძე პრემიერს

პოლიტიკა - 12:14, 19 Nov, 2015

2276

საპარლამენტო უმცირესობის ლიდერი - დავით ბაქრაძე ტრაგიკომიკურს უწოდებს პრემიერის განცხადებას, რომ ის და გიორგი კანდელაკი საქართველოსთვის უვიზო მიმოსვლის მიღებას ხელს უშლიან.

როგორც ბაქრაძე ამბობს, ერთადერთი ხელისშემშლელი ფაქტორი იმისთვის, რომ საქართველომ ევროკავშირისგან უვიზო მიმოსვლა არ მიიღოს შეიძლება იყოს მთავრობის ქმედებები.

„ცალსახად შემიძლია ვთქვა, რომ ჩვენ მხარს ვუჭერთ უსწრაფეს გადაწყვეტილებას ვიზა-ლიბერალიზაციაზე, რადგან ეს ეკუთვნის ქართველ ხალხს და არა - ღარიბაშვილის მთავრობას. თუმცა უნდა გვესმოდეს, რომ დღეს ვიზა-ლიბერალიზაციას ემუქრება ერთადერთი საფრთხე, ეს არის მთავრობის მოქმედებები ქვეყნის შიგნით და პირველ რიგში მცდელობა, რომ ხელში ჩაიგდოს „რუსთავი 2“. დღეს სწორედ ეს არის საფრთხის სფერო. ნებისმიერი მცდელობა, რომ ეს პრობლემა გადააბრალონ ოპოზიციას, არის უბრალოდ ტრაგიკომიკური და ალბათ ღირსეულ ადგილს დაიკავებს გადაბრალებების და ტყუილების იმ გრძელ ჯაჭვში, რომლითაც ხელისუფლება მეოთხე წელია კვებავს ჩვენს მოსახლეობას“, - განაცხადა ბაქრაძემ.

პრემიერის ინფორმაციით, „ნაციონალური მოძრაობის“ წევრები გიორგი კანდელაკი და დავით ბაქრაძე ევროკავშირს სთხოვენ, რომ საქართველომ უვიზო მიმოსვლა არ მიიღოს. როგორც ღარიბაშვილმა აღნიშნა, ევროპელმა კოლეგებმა ეს ინფორმაცია მინისტრთა კაბინეტის წევრებს დაუდასტურეს.