"მაგარ ტიპური და ძველბიჭური რიტორიკა"- ნარმანიას ოპოზიცია პასუხობს

პოლიტიკა - 19:28, 18 Nov, 2015

2314

თბილისის მერის დავით ნარმანიას მიერ დღეს გაკეთებულ განცხადებას, სადაც მან ოპოზიციის ნაწილს დესტრუქციული ძალა უწოდა, საკრებულოს წევრები გამოეხმაურნენ.

დამოუკიდებელი დეპუტატი ალეკო ელისაშვილი თბილისის მერის განცხადების კომენტირებისას აღნიშნავს, რომ "ნარმანიას პრობლემა უთავბოლობაა".

"მარტო რიტორიკა რომ იყოს პრობლემა, ამას ავიტანდით, მაგრამ სინამდვილეში ნარმანიას პრობლემა უთავბოლობაა და ეს უთავბოლობა უნდა გადაფაროს ამ რაღაცა ძალით, ვითომ მაგარ ტიპური და ძველბიჭური რიტორიკით. რა თქმა უნდა უმრავლესობა ახლა არ იმჩნევს, თორემ უმრავლესობის წიაღში მისი იმპიჩმენტის საკითხიც განიხილება" - აცხადებს ელისაშვილი.

"ერთიანი ნაციონალური მოძრაობის" წევრი საკრებულოში ირაკლი აბესაძე კი აღნიშნავს, რომ ვინ არის დესტრუქციული, მავნებელი და სამარცხვინო ამას საზოგადოება შეაფასებს.

"მძღოლების, დამგველების, მუზეუმის თანამშრომლების ნაცვლად ხელფასებს უზრდის ჩინოვნიკებს, პენსიონერის და სოციალურად დაუცველის ნაცვლად ავტობუსში უფასოდ მგზავრობს ყოფილი პატიმარი, კონკრეტული ინფრასტრუქტურული ობიექტების ნაცვლად, რომელიც ჩვენ შევთავაზეთ მათ განეხორციელებინათ საცობებისგან თბილისის განსატვირთავად, ისინი დაკავებულები არიან კორუფციით და უსაქმურობით, ასე რომ ვინ არის დესტრუქციული, მავნებელი და სამარცხვინო ამ ქალაქში, საზოგადოებამ შეაფასოს." განაცხადა ირაკლი აბესაძემ ნარმანიას საპასუხოდ.

ნარმანიას განცხადებას გამოეხმაურა საკრებულოს წევრი თამარ ცინცაბაძეც და აღნიშნა, რომ "მერს მთელი ის პასუხისმგებლობა რაც აქვს კარგად გაცნობიერებული არ აქვს".

თბილისის მერი დავით ნარმანია ოპოზიციას დესტრუქციულ და კონსტრუქციულ ოპოზიციად ყოფს. მისი თქმით, სწორედ დესტრუქციულ ოპოზიციასთან თანამშრომლობაზე ამბობს ის უარს.

„კონსტრუქციულ ოპოზიციასთან, რა თქმა უნდა, ვთანამშრომლობთ და ეს არის დემოკრატიის ერთ-ერთი მნიშნელოვანი ელემენტი, მაგრამ არიან რიგი დესტრუქციული ძალებისა, რომელთათვისაც უბრალოდ ინფორმაციის მიწოდებასაც კი აზრი არ აქვს, იმიტომ რომ ისინი ცდილობენ თეთრზე ისაუბრონ შავით. საზოგადოებამ კარგად იცის ვინ არიან ესეთნი და ვინ არიან ისეთნი“ - განაცხადა დღეს დავით ნარმანიამ.