ტელეკომპანია „რუსთავი2“-ის გენერალური დირექტორის ნიკა გვარამიას განცხადებას იმის შესახებ, რომ ვაიბერის მეშვეობით მისი, დავით ბაქრაძის, ირაკლი ალასანიას და გიგა ბოკერიას მოსმენა განხორციელდება, "თავისუფალი დემოკრატები" გამოეხმაურნენ.

როგორც "ნიუპოსტს" ირაკლი ალასანიას პარტიაში განუცხადეს, გვარამიას განცხადებაზე სპეკულაციებს ვერ დაიწყებენ.

"არ გვაქვს საშუალება გადავამოწმოთ ამგვარი ინფორმაცია, ამიტომ სპეკულაციებს გვარამიას ნათქვამის საფუძველზე ვერ დავიწყებთ.

დანამდვილებით რაც ვიცით არის ის, რომ ალასანიას ტელეფონის მოსმენა რუსეთის სპეცსამსახურებმა დაიწყეს 2003 წელს, როდესაც ხელმძღვანელობდა წარმატებულ ანტიტერორისტულ ოპერაციას პანკისში. ასევე გაგრძელდა ტელეფონის მოსმენა ნიუ იორკში, როდესაც ალასანიას და მის გუნდს გაქონდა პირველი დევნილების შესახებ რეზოლუცია გაეროს გენერალურ ანსამბლეაზე. ასევე დანამდვილებით ვიცით, რომ ალასანიას ტელეფონის მოსმენას FSB-ს მსგავსად შეუერთდა სააკაშვილის რეჟიმი 2006 წლიდან.

სამწუხაროდ დღევანდელმა ხელისუფლებამ ანალოგიური გზა აირჩია, რაც მოსმენებთან დაკავშირებით კანონის მიღების პროცესშიც გამოიხატა.

ეს ჩვენთვის სიახლე არ არის და ვპირდებით საზოგადოებას რომ პოლიტიკური ოპონენტების უკანონო მოსმენებს დავასრულებთ 2016 წელს"- აცხადებენ "თავისუფალი დემოკრატების" პრესსამსახურში.