ოლანდი შეიარაღებას აძლიერებს- "ჩვენ ვართ ომში, რომელიც ტერორიზმა ჩვენ წინააღმდეგ გამოაცხადა"

პოლიტიკა - 17:33, 18 Nov, 2015

1621

ფრანსუა ოლანდი საფრანგეთის ქალაქების მერების ასამბლეაზე სიტყვით გამოვიდა და ქვეყანაში მიმდინარე პროცესებზე და იმ ნაბიჯებზე ისაუბრა, რომელიც ქვეყანამ უსაფრთხოების გაძლიერების მიზნით უნდა გადადგას. ოლანდის თქმით დღეს სენ დენის სპეცოპერაციამ კიდევ ერთხელ აჩვენა, რომ ქვეყანა ომის რეჟიმშია.

„განსაკუთრებით საშიში და მძიმე ოპერაცია დასრულდა სულ ახლახანს. ამ მოვლენებმა გვაჩვენა, რომ ჩვენ ვართ ომში. რომელიც ტერორიზმა ჩვენ წინააღმდეგ გამოაცხადა.“- განაცხადა ოლანდმა მერების წინაშე გამოსვლისას და აღნიშნა, რომ 13 ნოემბერს პარიზში განხორციელებული თავდასხმა, მთელ ქვეყანაზე თავდასხმას გულისხმობდა. ოლანდმა დღეს სპეცოპერაციაში მონაწილე სამართალდამცავებს მადლობა გადაუხადა და აღნიშნა, რომ საფრანგეთი ამაყობს იმით, რომ მის მოქალაქეებს ასეთი დამცველები ჰყავთ.

„ეს ომი რამდენიმე წლის წინ დაიწყო და მის დასასრულებლად საჭირო იქნება დრო. ამიტომ ჩვენ მოთმინებით უნდა შევიარაღდეთ.“- აღნიშნა პრეზიდენტმა. მისი თქმით საქალაქო ადმინისტრაციებში უსაფრთხოების სამსახურების გაძლიერება მოხდება და საფრანგეთის კომუნებში პოლიციელების და ჟანდარმების რიგები უკეთ აღჭურვილი და შეიარაღებული ადამიანებით შეივსება. მუნიციპალური პოლიცია ნაციონალური პოლიციის მსგავსად შეიარაღდება.

„მე მინდა, რომ მთელი სახელმწიფო შესაძლებლობა ჩაიდოს იმაში, რომ ჩვენი თანამოქალაქეები უკეთ დაცულნი იყვნენ.“- აღნიშნა ოლანდმა. საფრანგეთის ლიდერის თქმით ამასთანავე გამკაცრდება ლტოლვილთა მიღებაზე კონტროლი.