ზოგს ვაშინგტონთან უნდა მჭიდრო ურთიერთობები, ზოგს მოსკოვთან, ასეთია დემოკრატია

ზოგს ვაშინგტონთან უნდა მჭიდრო ურთიერთობები, ზოგს მოსკოვთან, ასეთია დემოკრატია - ხიდაშელი

პოლიტიკა - 16:05, 18 Nov, 2015

1500

საქართველოს თავდაცვის მინისტრი თინა ხიდაშელი აცხადეს, რომ რუსეთის მიერ საქართველოს მიერთების საფრთხე არ არსებობს, სანამ ქვეყანში დღევანდელი ხელისუფლებაა.

ამ შინაარსის განცხადება მინისტრმა ჯონს ჰოპკინსის უნივერსიტეტის რუსეთის და ყოფილი საბჭოთა კავშირის მკვლევარის, დონალდ იენსენის განცხადების კომენტირებისას გააკეთა.

"რა თქმა უნდა, საქართველოში არსებობენ პოლიტიკოსები, ისევე როგორც ევროპის ქვეყნებში, რომლებსაც განსხვავებული მოსაზრებები აქვთ რუსულ სახელმწფიოსთან დაკავშირებით, ვიდრე მე მაქვს მაგალითად, ან ჩემი ხელისუფლების წარმომადგენლებს აქვთ. ეს ჩვეულებრივი ამბავია. დემოკრატია ასეთია – ზოგს ვაშინგტონთან უნდა მჭიდრო ურთიერთობები, ზოგს მოსკოვთან, ზოგს ბრიუსელი მოსწონს და ზოგს ჩეჩნეთი. ამოცანა ძალიან მარტივია, ან გინდა ბესლანის რუსეთი, ან გინდა იყო დასავლური, ცილიზებული, დემოკრატიული, თავისუფალი სამყაროს ნაწილი. ჩვენ თავისუფლება ავირჩიეთ" -განაცხადა თინა ხიდაშელმა.

ჯონს ჰოპკინსის უნივერსიტეტის რუსეთის და ყოფილი საბჭოთა კავშირის მკვლევარმა - დონალდ იენსენმა "ამერიკის ხმის" ქართულ სამსახურთან ინტერვიუში, საქართველოს შესახებ ისაუბრა და იმ ტენდენციებზე გაამახვილა ყურადღება რაც საქართველოს საგარეო პოლიტიკაში შეიმჩნევა.

იენსენი თვლის, რომ თავისუფალი ბაზრის პირობებში რუსულ ბიზნესს ქვეყნიდან ვერ გააძევებ, თუმცა იმედოვნებს რომ, საქართველოს მთავრობა რუსული გავლენების აღმოსაფხვრელად თანმიმდევრულად იმუშავებს, რათა დასავლეთის უპირატესობა აჩვენოს.