რესტორანში გამართული „ქართული ოცნების“ საოლქო კონფერენცია და მობილიზებული საჯარო მოხელეები

პოლიტიკა - 14:36, 18 Nov, 2015

3045

ქართული ოცნების“ საოლქო კონფერენციას, რომელიც ჩოხატაურში, რესტორან „ბახმაროში“ ჩატარდა, საჯარო მოხელეები ესწრებოდნენ. შეხვედრიაზე მუნიციპალიტეტის გამგეობისა და საკრებულოს თანამშრომლებთან ერთად, რამდენიმე საჯარო სკოლის დირექტორი და აიპის თანამშრომელი იმყოფებოდა.

როგორც აიპის თანამშრომლებმა "გურიის მოამბესთან" განაცხადეს, მათ გამგეობიდან დაურეკეს და შეხვედრაზე მისვლა დაავალეს, სხვა კონკრეტული ინფორმაცია არ ჰქონდათ. საჯარო მოხელეებმა კომენტარის გაკეთებისაგან თავი შეიკავეს. „ვერაფერს გეტყვით, დაგვირეკეს გამგეობიდან და მოვედით. არ ვიცი რა შეხვედრაა, მითხრეს კალაძე ჩამოდისო.“ - განაცხადა "გურიის მოამბესთან" ერთ-ერთმა მათგანმა.

შეხვედრა, რომელიც საკრებულოს თავმჯდომარემ ზაალ მამალაძე გახნა, დახურულ კარს მიღმა, ნახევარ საათს გრძელდებოდა.

„დღეს ვიმყოფებით გურიის რეგიონში, ჩოხატაურში მოხდა ადგილობრივი რაიონული ორგანიზაციის ადგილობრივი თავმჯდომარის არჩევა, ბატონი ირაკლი კუჭავა იქნა არჩეული. იცით, რომ მთელი ქვეყნის მაშტაბით დავიწყეთ კონფერენციების ჩატარებას, ეს პროცესი გაგრძელდება, რადგან მნიშვნელოვანია პარტიის სტრუქტურულად გაძლიერება. თან ის, რომ 2016 წლის საპარლამენტო არჩევნები მოდის, ჩვენ ამ სამი წლის განმავლობაში არ გვქონდა საშუალება პარტია გაგვეძლიერებინა, დღეს გვაქვს ამის რეალური შანსი და ამ მიმართულებით ძალიან ბევრს ვმუშაობთ“- განაცხადა „გურიის მოამბესთან“ კახი კალაძემ.