პრაღაში აბაშიძე-კარასინის შეხვედრა ხვალ გაიმართება. როგორც რუსეთთან ურთიერთობის საკითხებში პრემიერის სპეციალური წარმომადგენელი ამბობს, შეხვედრაზე საქართველოს მოქალაქეებისთვის სავიზო რეჟიმის გამარტივებაზე იქნება საუბარი.

როგორც ზურაბ აბაშიძე ამბობს, დაზუსტდება მოსახლეობის რომელ კატეგორიას შეეძლება უვიზო მიმოსვლა რუსეთთან.

მისივე ინფორმაციით, შეხვედრის დროს ჯაშუშების გადმოცემის საკითხზე იმსჯელებენ.

„რუსეთის მხრიდან გაკეთდა რაღაც მინიშნებები იმის თაობაზე, რომ აპირებენ სავიზო რეჟიმის შერბილებას ჩვენი მოექალაქეებისთვის. მოვისმენთ მათ პოზიციას, ვნახოთ რა იქნება. ჩვენ 2011 წელს სავიზო რეჟიმი საერთოდ მოვხსენით და წელს კიდევ უფრო გავამარტივეთ, როგორც რუსეთის მოქალაქეებისთვის, ასევე 90 ქვეყანაა, რომლის მოქალაქეებსაც უვიზოდ ჩამოსვლა შეუძლიათ“, - განაცხადა აბაშიძემ.

რაც შეეხება კითხვას, ისაუბრებენ თუ არა პრაღაში გამართულ შეხვედრაზე „გაზპრომის“ საკითხზე, აბაშიძე ამბობს, რომ კარასინთან ამ თემაზე საუბარს არ აპირებს.