პრემია შემცირდა 31 მილიონით, სახელფასო დანამატი გაიზარდა 45 მილიონით

პრემია შემცირდა 31 მილიონით, სახელფასო დანამატი გაიზარდა 45 მილიონით - უწყებებში გაზრდილი დანამატები

პოლიტიკა - 23:05, 17 Nov, 2015

2084

სახელმწიფო აუდიტის სამსახურის ხელმძღვანელის ლაშა თორდიას განცხადებით, საჯარო უწყებებში დასაქმებული ადამიანები პრემიებს უნდა იღებდნენ, თუმცა ეს უნდა იყოს დასაბუთებული.

ამის შესახებ თორდიამ გადაცემა „არჩევანში“ განაცხადა. თორდიამ პრემიების და სახელფასო დანამატების გაცემის წესზე ისაუბრა და აღნიშნა, რომ ყველა უწყება სწორედ ამ წესის მიხედვით უნდა მოქმედებდეს.

როგორც მთავარი აუდიტორი ამბობს, ხშირ შემთხვევაში უწყებების ხელძძღვანელებს ერთი წლით ადრე აქვთ გამოწერილი სახელფასო დანამატები, რაც დადგენილ წესს არ შეესაბამება.

„მთავრობის დადგენილებით არის წესი თუ რა შემთხვევაში გაიცემა პრემია და რა შემთხვევაში გაიცემა დანამატი. ამ ნორმატიული აქტებიდან გამომდინარე ვაკეთებთ ჩვენ შეფასებებს. როდესაც ჩვენ სხვადასხვა უწყებებში ვხედავთ, რომ ერთი წლით ადრე აქვთ დანიშნული უწყების ხელმძღვანელებს დანამატები ეს ეწინააღმდეგება დანაწესს. არ შეიძლება წინასწარ განისაზღვროს ვინ ღამის ცვლაში იმუშავებს ან დამატებით სამუშაოს შეასრულებს. სწორედ მსგავს შემთხვევაში გაიცემა სახელფასო დანამატი. ასევე დავინახეთ, რომ მკვეთრად გაიზარდა დანამატის განაცემები. მაგალითისთის, ინფრასტრუქტურის სამინისტროში დანამატები 69%-ით გაიზარდა, იუსტიციის სამინისტრო 206%-ით, სასჯელაღსრულების სამინისტროში 414%-ით, კულტურის სამინისტროში 1509%-ოთ, ჯანდაცვის სამინისტროში 270%-ით და ასე შემდეგ. ამის შემდეგ ჩვენ გავაკეთეთ დასკვნა, რომ პრემიის გაცემა შეიცვალა დანამატით“, - ამბობს თორდია.

კითხვაზე რამდენად მიუახლოვდა სახელფასო დანამატების რაოდენობა პრემიების რაოდენობას, თორდია პასუხობს:

„მოგაწოდებთ ინფორმაციას, თუ თანხობრივ გამოხატულებაში რამდენით შეიცვალა, ეს არის ბიუჯეტის ჩანაწერი - პრემია შემცირდა 31 მილიონით, სახელფასო დანამატი გაიზარდა 45 მილიონით. მინდა ავღნიშნო, რომ ჩვენ არ ვეწინააღმდეგებით პრემიებს ან დანამატებს. მაგრამ განაცემები უნდა იყოს დარეგულირებული. ადამიანები უნდა იღებდნენ პრემიებს თუმცა ყველა პრემია დასაბუთებული უნდა იყოს“, - აღნიშნა თორდიამ.