"არ მინდა ჩავთვალო, რომ პრეზიდენტისა და პრემიერის ინიციატივები წინააღმდეგობაში მოდის ერთმანეთთან"

პოლიტიკა - 12:05, 17 Nov, 2015

1178

საპარლამენტო უმრავლესობის დეპუტატი გედევან ფოფხაძე თვლის, რომ უშიშროების და კრიზისების მართვის საბჭოებოს გამართვა ერთმანეთთან წინააღმდეგობაში არ მოდის.

ამის შესახებ ფოფხაძემ ჟურნალისტებთან საუბრისას განაცხადა.

„არ მინდა, რომ ამ შემთხვევაში პრეზიდენტისა და პრემიერის ინიციატივები, ქვეტექსტშიც კი ჩავთვალო, რომ წინააღმდეგობაში მოდის ერთმანეთთან, ეს ძალიან მეორეხარისხოვანია ახლა. პრეზიდენტის ინსტიტუტი ისეთი ინსტიტუტია, რომ თავისთავად აქვს ეს ფუნქცია და პრეზიდენტმა ეს უნდა გააკეთოს, მაგრამ ეს იმას არ ნიშნავს, რომ აქ სრული გადაკვეთა ხდება“, - განაცხადა ფოფხაძემ.

ირაკლი სესიაშვილის თქმით, თუ პრეზიდენტს სჭირდება კონსულტაცია უშიშროების საბჭოს წევრებისგან , მაშინ სხდომა უნდა იყოს მოწვეული და ამაში გასაკვირი არაფერია.

„უშიშროების საბჭო არის პრეზიდენტის სათათბირო ორგანო. თუ ბატონი პრეზიდენტი ჩათვლის საჭიროდ, რომ მას სჭირდება თათბირი, რჩევა და კონსულტაცია უშიშროების საბჭოს წევრებისგან. მას აქვს სრული უფლება, რომ ეს მოიწვიოს, ეს მისი გადასაწყვეტია. თავისთავად ცხადია, როცა ასეთი ვითარებაა უსაფრთხოების სამსახურები გადადიან განსაკუთრებულ რეჟიმში მუშაობაზე და ეს ჩვეულებრივი მოვლენაა“, - განაცხადა სესიაშვილმა.

შეგახსენებთ, პრეზიდენტს უშიშროების საბჭოს სხდომის მოწვევა "ნაციონალურმა მოძრაობამ" სთხოვა.

რაც შეეხება კრიზისების მართვის საბჭოს სხდომას იგი პრემიერმა მოიწვია.