თავდაცვის კომიტეტმა სამხედრო სავალდებულო სამსახურის გაუქმების საკითხი არ განიხილა

პოლიტიკა - 19:33, 16 Nov, 2015

2275

თავდაცვის კომიტეტმა ზურაბ ჯაფარიძის კანონპროექტი „სამხედრო ვალდებულებებისა და სამხედრო სამსახურის შესახებ“ დღის წესრიგში არ ჩასვა. თავდაცვის კომიტეტის თავმჯდომარე ირაკლი სესიაშვილმა განმარტა, რომ კანონპროექტის თაობაზე საპროცედურო და ადამიანის უფლებათა დაცვის კომიტეტების დასკვნები არ იყო წარდგენილი, რის გამოც, საკითხი დღის წესრიგში ვერ ჩასვამდა.

„ეს წამყვანი კომიტეტია, შესაბამისად რეგლამენტის მიხედვით მან უნდა გაიაროს სავალდებულო კომიტეტები. მე მისი ეს ინიციატივა პოპულიზმთან გავაიგივე, რადგან თავად ზურაბ ჯაფარიძის კომიტეტებში დაუსწრებლობაა მიზეზი საკითხის გაჭიანურებისა,“ - განაცხადა ირაკლი სესიაშვილმა.

სესიაშვილის განცხადება ჯაფარიძემ გააპროტესტა და აღნიშნა, რომ ის კომიტეტში დასკვნებს წარადგენს. მისი თქმით არსებობდა ზეპირი შეთანხმება, რომ ამ კანონპროექტს დღეს განიხილავდნენ.

„მეუბნებიან, რომ რაღაც პროცედურული ნორმები არ არის დაცული და ორი კომიტეტის დასკვნა აკლიაო, ნამდვილად ეს ასეა, აკლია, თუმცა ჩვენ შეთანხმებულები ვიყავით, რომ ეს საკითხი დღეს უნდა განხილულიყო. სავარაუდოდ რაღაც აქცია, რომ იყო დაანონსებული პარლამენტის შენობის წინ, ამან გაუჩინა რაღაც შიშები და გადაწყვიტეს რომ დღეს ეს საკითხი არ განიხილონ,“ - აღნიშნა ზურაბ ჯაფარიძემ.

შეგახსენებთ აპც „გირჩის“ დამფუძნებლის ზურაბ ჯაფარიძის ინიციატივა სამხედრო სავალდებულო სამსახურის გაუქმებას ითვალისწინებს.