ეჭვს გამოიწვევს თუ რუსთავი 2 ზეკრიტიკულიდან გახდება ნეიტრალური, ან კიდევ უარესი, პროსამთავრობო

ეჭვს გამოიწვევს თუ რუსთავი 2 ზეკრიტიკულიდან გახდება ნეიტრალური, ან კიდევ უარესი, პროსამთავრობო - იან კელი

პოლიტიკა - 10:17, 16 Nov, 2015

2469

რუსთავი 2-ის ირგვლივ განვითარებულ მოვლენებზე ისაუბრა ამერიკის შეერთებული შტატების ელჩმა. როგორც იან კელი ,,კვირის პალიტრასთან" ინტერვიუში აცხადებს, თუ საბოლოოდ არხი პროსამთავრობო გახდა და მასზე წვდომა ოპოზიციამ დაკარგა ეს გამოიწვევს ეჭვს, რომ საქართველოში უზრუნველყოფილი არ იქნება თანაბარი სათამაშო ველი.

"ამიტომ არ იქნება სწორი, სასამართლო პროცესის სამართლებრივ ბუნებაზე ვისაუბრო, რაც არ ნიშნავს, რომ ჩემი აზრი არ გამაჩნია. ამერიკის შეერთებულ შტატებსა და საქართველოს ერთი საერთო მიზანი გვაქვს - იმის უზრუნველყოფა, რომ საქართველომ მიაღწიოს მიზანს და ევროატლანტიკური სისტემის სრულფასოვანი წევრი გახდეს. ვთვლი, რომ ჩემი როლი იმის აღნიშვნაა, თუ რა დევს ფსონად და რა შეიძლება მოჰყვეს გარკვეულ ქმედებებს. იწყება საარჩევნო წელი (თუ უკვე არ არის დაწყებული) და ნამდვილად უცნაური იქნება წამყვანი ოპოზიციური არხის მიერ მისი სარედაქციო პოლიტიკის შეცვლა. თუ საბოლოო შედეგი ამ ქმედებისა იქნება ის, რომ ოპოზიცია საბოლოოდ დაკარგავს წვდომას ამ სატელევიზიო არხზე ან ეს არხი ზეკრიტიკულიდან გახდება ნეიტრალური, ან კიდევ უარესი, პროსამთავრობო, ეს გამოიწვევს ეჭვს, რომ საქართველოში არ არის უზრუნველყოფილი თანაბარი სათამაშო ველი", - განაცხადა იან კელიმ.

რაც შეეხება კითხვას „რუსთავი 2“-ის გენდირექტორის და ექსპრეზიდენტის მიხეილ სააკაშვილის სატელეფონო ჩანაწერებზე, ელჩი ამბობს, რომ ამაზე კომენტარის გაკეთება რთულია, რადგან დასადგენია რამდენად რეალურია ჩანაწერები.

„მათ უფლება აქვთ, გააჟღერონ ის მოსაზრებები, რომლებიც შესაძლოა, გამოხატავდეს თუნდაც ”ნაციონალური მოძრაობის” ინტერესებს. გულახდილად გეტყვით - ამერიკაში გვაქვს სატელევიზიო არხები, რომელთა ყურების შედეგად ლამის გულის შეტევა მივიღო ხოლმე. მაგალითად, ვერ ვუყურებ ”რაშა თუდეის”. თუმცა პასუხი ამაზე არ არის მენეჯმენტის შეცვლა, პასუხი ღია კონკურენციაა. რაც შეეხება უკანონო მოსმენების შედეგად მიღებულ ინფორმაციას, რთულია იმის თქმა, რამდენად რეალურია ეს“, - ამბობს კელი.