ხაშურში წყალდიდობამ 150 ოჯახი დააზარალა

პოლიტიკა - 22:43, 14 Nov, 2015

1828

შიდა ქართლში სტიქიისაგან მიყენებულ ინფრასტრუქტურულ ზარალს მთავრობა აანაზღაურებს, ამის შესახებ რეგიონებთან და ადგილობრივ თვითმმართველ ორგანოებთან ურთიერთობის დეპარტამენტის ხელმძღვენელმა გიორგი ამაშუკელმა შიდა ქართლის სამხარეო ადმინსტრაციაში გამართულ საგანგებო შტაბის სხდომაზე განაცხადა.
სხდომას მხარის გუბერნატორი ზურაბ რუსიშვილი, მუნიციპალიტეტების ხელმძღვანელები, საგანგებო სიტუაციების მართვის სამსახურის ხელმძღვანელები, "ენერგო პრო ჯორჯიას" წარმომადგენლები და საპატრულო პოლიციის შიდა ქართლის სამმართველოს ხელმძღვანელი დაესწრნენ. მუნიციპალიტეტების გამგებლებმა საგანგებო შტაბის წევრებს მათ რაიონებში არსებული ვითარება გააცნეს.
ხაშურის მუნიციპალიტეტის გამგებლის გიორგი გურასპაშვილის ინფორმაციით, ვითარება რთული რჩება, თუმცა ამ დროისთვის წყლის დონემ ცოტა დაიწია და სამაშველო სამსახურებმა სტიქიის შედგების სალიკვიდაციო სამუშაოები დაიწყეს. გურასპაშვილის თქმითვე სამუშაოები მთელი ღამის განმავლობაში გაგრძელდება. ხაშურის მუნიციპალიტეტში, განსაკუთრებულად რთული ვითარება გომის თემის სოფლებშია შექმნილი, სახლები დატბორილია ოსიაურში და ხაშურის გარკვეულ ნაწილში. მუნიციპალიტეტში ამ დროის მონაცემებით სულ 150 ოჯახია დაზარალებული, ასევე ინფრასტრუქტურული პრობლემებია შექმნილი სამ საბავშვო ბაღში.
რაც შეეხება ქარელის მუნიციპალიტეტს, რაიონის გამგებლის ზაზა გულიაშვილის თქმით, კალაპოტიდან გადმოსულმა მდინარე სურამულამ სოფელ მოხისში დევნილთა დასახლება დატბორა, რის გამოც კოტეჯებიდან 17 ოჯახის გამოყვანა გახდა საჭირო. ქარელის მუნიციპალიტეტს დევნილებისთვის შესაბამისი ფართი გორის მერიამ შესთავაზა. ამ დროისთვის 30-მდე ადამიანი გორში, სპორტ სკოლის სასტუმროშია გადაყვანილი. გულიაშვილის თქმით, აღნიშნულ დასახლებაში მცხოვრებმა სხვა დევნილებმა ნათესავებს შეაფარეს თავი. დევნილთა ჩასახლებაში განადგურებულია საოჯახო ტექნიკა და დახოცილია შინაური ფრინველი. რაც შეეხება კასპისა და გორს მუნიციპალიტეტებს, აღნიშნულ ტერიტორიებზე ძირითადად ქარის შედეგად მიყენებული ზარალია დაფიქსირებული და ათობით საცხოვრებელი სახლი სახურავის გარეშეა დარჩენილი. მუნიციპალიტეტში სპეციალურად შექმნილი კომისიები ზარალს უკვე ითვლიან. შსს-ს საგანგებო სიტუაციების მართვის დეპარტამენტის უფროსის ზვიად ქაწაშვილის განცხადებით ამ დროისთვის შიდა ქართლში და სხვა რეგიონებშიც ვითარება სტაბილურია და საფრთხე არცერთ მოქალაქეს არ ექმუქრება, მისივე ინფორმაციით მეხანძრე-მაშველები ამ დრომდე თავდაუზოგავად მუშაოებენ.