მოქალაქე ივანიშვილს არ მივცემთ უფლებას დააკნინოს პრეზიდენტის ინსტიტუტი

მოქალაქე ივანიშვილს არ მივცემთ უფლებას დააკნინოს პრეზიდენტის ინსტიტუტი - “ახალი მემარჯვენეები“

პოლიტიკა - 17:34, 11 Nov, 2015

1338

„ახალი მემარჯვენეები“ ავლაბრის რეზიდენციის შესახებ ივანიშვილისა და მთავრობის მოწოდებებს განცხადებით ეხმაურებიან. მემარჯვენეები მიიჩნევენ, რომ ივანიშვილის განცხადებები სცდება სამართლებრივ ფარგლებს და მიზნად ისახავს პრეზიდენტის ინსტიტუტის დაკნინებას.

"ნიუპოსტი" ახალი მემარჯვენეების განცხადებას უცვლელად გთავაზობთ.

„ახალი მემარჯვენეები“ ვაცხადებთ, რომ არ მივცემთ უფლებას არც მოქალაქე ივანიშვილს და არც სხვას, დააკნინოს, ავტორიტეტი შეულახოს და ხელი შეუშალოს პრეზიდენტის ინსტიტუტს, როგორც ხელისუფლების მიუკერძოებელ და დამოუკიდებელ შტოს, რომლის არსებობა უდავოდ ერთ-ერთი ყველაზე მნიშვნელოვანი წარმატებაა ქვეყნის დემოკრატიული განვითარების გზაზე.

საქართველოს კონსტიტუციის თანახმად პრეზიდენტი არის ქვეყნის სახელმწიფოებრიობის, ერთიანობის და ეროვნული დამოუკიდებლობის გარანტი და კატეგორიულად მიუღებლად მიგვაჩნია გაუთავებელი საუბარი და მუქარა პრეზიდენტის სასახლიდან მისი გამოსახლების შესახებ.

ფაქტია, რომ ამ გზით ივანიშვილი ცდილობს დააკნინოს პრეზიდენტის ინსტიტუტი, როგორც ერთადერთი ინსტიტუციაა საქართველოში, რომელიც არ მოექცა მისი გავლენის ქვეშ.

მით უმეტეს მიუღებელი და ცინიკურია, როდესაც ეს კეთდება ბიუჯეტის ხარჯების შემცირების და ხალხზე ზრუნვის საბაბით იმ ხელისუფლების მხრიდან, რომელმაც 400 მილიონი ლარით გაზარდა ქვეყნის ბიუჯეტში სახელმწიფო მოხელეთა სახელფასო ანაზღაურების ხარჯები. მოსახლეობამ უნდა იცოდეს, რომ 2016 წელს 1 მლრდ. 500 მლნ. ლარია გათვალისწინებული მხოლოდ სახელმწიფო მოხელეთა ხელფასებისთვის და ამაში არ შედის მათი შენახვისთვის საჭირო სხვა თანხები, როგორიცაა საწვავი, საკომუნიკაციო ხარჯები და სხვ., ასევე ადგილობრივი თვითმმართველობების და ე.წ. აიპ-ების ხარჯები, რომლებშიც ძირითადად „ქართული ოცნების“ აქტივისტები და ადგილობრივი წარმოამდგენლების ნათესავ- მეგობრები არიან დასაქმებული.

„ახალი მემარჯვენეები“ ვთვლით, რომ პრეზიდენტის სასახლე გარკვეული სიმბოლური დატვირთვის მატარებელია და ყველაფერი უნდა გაკეთდეს იმისთვის რომ, საქართველოშიც, სხვა დემოკრატიული სახელმწიფოების მსგავსად დამკვიდრდეს ტრადიცია პრეზიდენტის სასახლე იყოს ყოფილი, ამჟამინდელი და მომავალი პრეზიდენტების სამუშაო ადგილი და არავის ჰქონდეს უფლება მანიპულირების იარაღად გამოიყენოს ეს თემა.