„პატრიოტთა ალიანსის“ მოშიმშილეთ აქციას გურიის რეგიონიც შეუერთდება და ეს მანამდე გაგრძელდება, ვიდრე ხელისუფლება ჩვენთან დიალოგზე არ წამოვა“,- ამის შესახებ „პატრიოტთა ალიანსის“ ადგილობრივი ორგანიზაციის ხელმძღვანელმა შოთა გოგიბერიძემ განაცხადა.

მან ასევე მხარდამჭერებს მოუწოდა დედაქალაქში მიმდინარე საპროტესტო ღონისძიებების მიმართ სოლიდარობის აქტის დაფიქსირების მიზნით რეგისტრაცია ადგილობრივი ორგანიზაციების ოფისებში გაიარონ.

„მიმდინარე წლის 8 ნოემბერს „პატრიოტთა ალიანსმა“ ქალაქ თბილისში დაიწყო ფართომასშტაბიანი აქცია, რუსთაველის გამზირზე შეკრებილმა 20 ათასამდე მხარდამჭერმა სლოგანით „არა გაყალბებულ არჩევნებს“ გააპროტესტა. მანიფესტაციამ მოგვიანებით ჯერ პარლამენტის შენობასთან, შემდეგ კი მთავრობის კანცელარიასთან გადაინაცვლა. მიმდინარე აქციას სულ მალე რეგიონები შეუერთდება, მივმართავთ პროტესტის უკიდრეს და უმძიმეს ფორმას- უვადო შიმშილობას, თავდაპირველად ეს დიდ ქალაქებში დაიწყება, შემდეგ კი ყველა მუნიციპალური ერთეული და თვითმმართველი ქალაქი შეუერთდება, მათ შორის გურიაც. აქციაში ჩაერთვება როგორც ოზურგეთი, ასევე ლანჩხუთი და ჩოხატაური, _ განაცხადა „პატრიოტთა ალიანსის“ ადგილობრივმა ლიდერმა შოთა გოგიბერიძემ.