ირანის რესურსები მაქსიმალურად უნდა შემოვიტანოთ - კალაძე ირანული გაზი შემოტანაზე

პოლიტიკა - 12:35, 11 Nov, 2015

1985

ენერგეტიკის მინისტრის კახი კალაძის თქმით, მთავრობამ ყველაფერი უნდა გააკეთოს იმისთვის, რომ ირანის რესურსები ქვეყნის საკეთილდღეოდ იქნას გამოყენებული.

მისი თქმით, ირანული გაზი საქართველოში შემოტანილი უნდა იყოს. მიზეზად კალაძე კვლავ კონკურენციას ასახელებს.

„მაქსიმალურად უნდა ვიყოთ ჩართულები და ყველაფერი უნდა გავაკეთოთ იმისთვის, რომ მათი რესურსები გამოყენებული იქნას ჩვენს საკეთილდღეოდ, შემოტანილ იქნას საქართველოში შეძლებისდაგვარად, რომ იყოს უფრო მეტი კონკურენცია. თუ იქნება კონკურენტუნარიანი ფასები მათი მხრიდან შემოთავაზებული, მაშინ შესაძლებელი იქნება იყოს ბაზარზე და კონკურენცია გაუწიოს სხვა მომწოდებლებს", - განაცხადა კალაძემ და აღნიშნა, რომ ირანში ვიზიტი უახლოეს მომავალში შედგება.

რაც შეეხება რუსულ გაზს, კალაძე ამბობს, რომ საქართველო ვერ იქნება დამოკიდებული რუსულ გაზზე.

"საქართველო ვერ იქნება დამოკიდებული რუსულ გაზზე, რადგან ჩვენ სხვა წყაროები გვაქვს, 2019 წელს შემოდის ახალი პროექტი, შაჰდენიზის მეორე ბაზა, რომელიც სრულდება და აქედან კიდევ დამატებით მოცულობებს მივიღებთ. ჩვენ, რა თმა უნდა, უნდა ვიმუშაოთ იმისათვის, რომ შემოვიყვანოთ სხვა ალტერნატიული მომწოდებლები, როგორიცაა თურქმენეთი, ირანი. ამ მიმართულებით ვმუშაობთ", - განაცხადა კახი კალაძემ.