არასამთავრობოები, პრეზიდენტი, ელჩები - "რ2"-ის შემდეგ ივანიშვილის სამიზნეები გახდებიან

სოც.მედია - 19:21, 10 Nov, 2015

1989

არასამთავრობო ორგანიზაცია „საქართველოს რეფორმების ასოციაციის“ დირექტორი სერგი კაპანაძე ყოფილი პრემიერ-მინისტრის დღეს გაკეთებულ განცხადებებს ეხმაურება. კაპანაძის თქმით ივანიშვილის საუბრიდან ნათელი გახდა, თუ რის გაკეთებას აპირებს ექს-პრემიერი მას შემდეგ რაც ტელეკომპანია „რუსთავი2“-ის საქმე მოგვარდება:

„როგორც დღეს გავიგეთ, პოსტ-რუსთავი 2-ის ეპოქაში:
- შეიზღუდება არასამთავრობო ორგანიზაციების საქმიანობა, მაგალითად, მათთვის უცხო ქვეყნიდან მიღებული დაფინანსების აკრძალვის, ან შეზღუდვის გზით;
- პრეზიდენტი გამოსახლდება რეზიდენციიდან და გადაყვანილ იქნება უფრო "მომცრო" რეზიდენციაში, საიდანაც ვეღარ შეძლებს ცინიზმის ეგრერიგ გამოსხივებას;
- უცხო ქვეყნის დიპლომატებს და საერთაშორისო ორგანიზაციების კრიტიკულად განწყობილ წარმომადგენლებს მორიგჯერ განემარტებათ, რომ არ ჩაერიონ ჩვენს შიდა საქმეებში, რამეთუ ჩვენ არ ვერევით მათ საქმეებში და არავის ჭკუას არ ვასწავლით;
ეს მხოლოდ დღეს რაც გამოჩნდა. შეგიძლიათ განავითაროთ წარმოდგენა და ფანტაზია...
ჰოდა, არ იქნება ეგ პოსტ-რუსთავი 2-ის ეპოქა! აგერ ნახავთ!“- წერს სერგი კაპანაძე ფეისბუკზე