"ნაციონალური მოძრაობის" წევრი გიორგი ვაშაძე უმრავლესობის დეპუტატს ეკა ბესელიას "ბესელია გამათავისუფლებელს" უწოდებს.

ამის შესახებ ვაშაძემ "კურიერთან" საუბრისას განაცხადა და აღნიშნა, რომ ბესელია მიმდინარე მოვლენებზე ცინიკურ განცხადებებს აკეთებს.

"მე მას ალბათ უფრო ბესელია გამათავისუფლებელს ვუწოდებდი. ის მოდის გამათავისუფლებლის მანტიით. სამწუხაროდ, ეს ბელეტრისტიკა რაც ჩვენ მოვისმინეთ, სამი წელია ესმით მოქალაქეებს. ამან მიიყვანა ხალხი გაჭირვებამდე და ეკონომიკა გაუბედურებამდე. ამის გადასაფარად "ქართულმა ოცნებამ" თავისუფალი სიტყვის მოსპობა გადაწყვიტა. მოვუწოდებ მოქალაქეებს - დღეს არის გადამწყვეტი მომენტი , ან გვინდა წარმატებული და დემოკრატიული ქვეყანა ან ვიქნებით ივანიშვილის მართულები", - განაცხადა ვაშაძემ.