რუსთავი 2-ის ირგვლივ განვითარებულ მოვლენებს აქტიურად აშუქებს უცხოური მედია.

ტელეკომპანიის მენეჯმენტის შეცვლას „ამერიკის ხმაც“ ეხმაურება. სტატიაში ნათქვამია, რომ სასამართლოს გადაწყვეტილება მენეჯმენტის შეცვლის შესახებ დასავლეთის შეშფოთებას იწვევს.

„მედიის უფლებების დამცველები, დიპლომატები ევროპიდან და ამერიკიდან. რუსთავი 2-ის მენეჯმენტის შეცვლასთან დაკავშირებით შეშფოთებას გამოხატავენ და ამ ფაქტს მედიის სარედაქციო პოლიტიკის თავისუფლებისა და სასამართლო სისტემის დამოუკიდებლობის პრინციპებთან შეუთავსებელს უწოდებენ“- ნათქვამია სტატიაში.

გამოცემა, მედიის თავისუფლების საკითხებში ეუთოს წარმომადგენლის, დუნია მიატოვიჩის განცხადებას ციტირებს:

„სარედაქციო გადაწყვეტილებები უნდა მიიღონ ნიუს-რუმში და არა სასამართლო დარბაზებში. სასამართლოს მცდელობა არასწორი და უკანონო გავლენა მოახდინოს მედიასაშუალებების სარედაქციო პოლიტიკაზე, არაფერია თუ არა კანონის უზენაესობიისა და საზოგადოებაში დემოკრატიული საფუძლების ბოროტად გამოყენება.

მიატოვიჩმა მოუწოდა საქართველოს სასამართლო სისტემას პატივი სცეს რუსთავი 2-ის სარედაქციო დამოუკიდებლობის უფლებას“ - აღნიშნულია სტატიაში.

პუბლიკაციაში ნათქვამია, რომ საქართველოში აშშ-ის საელჩო და ევროკავშირის წარმომადგენლობა, მთავრობასა და სასამართლოს მედიის თავისუფლებისა და პოლიტიკური პლურალიზმის დაცვისკენ მოუწოდებს.

„აშშ-ის და ევროკავშირის წარმოამდგენლების მსგავსად, საქართველოს პრეზიდენტმა, გიორგი მარგველაშვილმა მმართველ კოალიციას მოუწოდა, უზრუნველყოს ის, რომ არ დარჩეს კითხვები სასამართლოს დამოუკიდებლობისა და მედიის თავისუფლების შესახებ“ - აღნიშნავს „ამერიკის ხმა.“