სრულიად საქართველოს კათოლიკოს-პატრიარქმა ილია მეორემ აზერბაიჯანის პრეზიდენტს ილჰამ ალიევს უმასპინძლა. ილჰამ ალიევისა და ილია მეორის შეხვედრაზე, რომელიც დაახლოებით ნახევარი საათი გაგრძელდა, საუბარი სხვადასხვა საკითხს შეეხო, მათ შორის აზერბაიჯანში ქართველი ეპისკოპოსის მსახურებისა და დავით გარეჯის სამონასტრო კომპლექსის საკითხებს. ილია მეორემ ორ ქვეყანას შორის არსებულ ურთიერთობაზე ისაუბრა, მისი თქმით ურთიერთობები აზერბაიჯანსა და საქართველოს შორის სხვებისთვის მაგალითია. პატრიარქმა ასევე აღნიშნა, რომ მას ახლო ურთიერთობები ჰქონდა ილჰამ ალიევის მამასთან.

„მთელი საქართველოს მართლმადიდებელი ეკლესიის, წმინდა სინოდის და ჩემი სახელით მინდა მოგესალმოთ. ჩვენი ურთიერთობები დიდი ხნის განმავლობაში გრძელდება, მე ძალიან მჭიდრო კავშირები მქონდა თქვენს მამასთან. მახსოვს თქვენი სითბო და სტუმართმოყვარეობა. ურთიერთობები ჩვენს ქვეყნებს შორის მაგალითია სხვებისთვის. ყველაფერს ვაკეთებთ იმისთვის, რომ კავკასიაში მშვიდობა შევინარჩუნოთ. ჩვენს რელიგიებს შორის ურთიერთობაც ძალიან კარგია. მუსლიმები ჩვენთან კარგად ცხოვრობენ, ყოველ შემთხვევაში, იმაზე უარესად არა, ვიდრე თქვენთან. უნდა ვთქვა, რომ 300-ზე მეტი მეჩეთია საქართველოში, ამიტომ ალბათ აზერბაიჯანში ქრისტიანებიც უნდა დაგვეწიონ. „დიდი მნიშვნელობა აქვს საგარეჯოში სამონასტრო კომპლექსს, რომლის ნაწილიც აზერბაიჯანის ტერიტორიაზეა. ვფიქრობ ამ საკითხების მოგვარება შესაძლებელია. ყველაფერს ვაკეთებთ, რომ მშვიდობა იყოს კავკასიაში. ვღელავთ რომ ტერიტორიული მთლიანობის დარღვევის ფაქტები ხდება აზერბაიჯანშიც და საქართველოშიც. იმედს გამოვთქვამთ, რომ ჩვენი ქვეყნების ტერიტორიული მთლიანობა იქნება აღდგენილი,“ - აღნიშნა პატრიარქმა.

პატრიარქის თქმითვე, პოზიტივის მიუხედავად, არის გარკვეული საკითხები, რომლებიც გადაწყვეტას მოითხოვს.

"მაგალითად, რუსულ მართლმადიდებელ ეკლესიას თავისი ეპისკოპოსი ჰყავს აზერბაიჯანში, კარგი იქნებოდა, საქართველოსაც ჰყოლოდა".

საუბრის დროს ილია მეორემ მადლობა გადაუხადა აზერბაიჯანის პრეზიდენტს იმისთვისაც, რომ აზერბაიჯანული ნავთობკომპანია „სოკარი" თავსი თავზე იღებს პასუხისმგებლობას უფასო გაზით მოამარაგოს ქვეყნის ტერიტორიაზე არსებული რელიგიური დაწესებულებები.

"გისურვებთ დიდხანს იყოთ, დიდხანს ახაროთ არა მხოლოდ აზერბაიჯანელები, ჩვენც, მთელი კავკასიაც. პირადად დიდი მადლობა თქვენ იმისთვის, რომ "სოკარის" უფასო გაზს ვიღებთ ყველა რელიგიის წარმომადგენელი. მოხარული ვიქნებით, თუ ჩვენი ურთიერთობები ახალ იმპულსს შეიძენს", - განაცხადა ილია მეორემ.