"მეგობრობასაც აქვს ზღვარი"- მეჭიაური აშშ-ის ელჩისგან ბოდიშის მოხდას ითხოვს

პოლიტიკა - 15:21, 06 Nov, 2015

3565

საპარლამენტო უმრავლესობის წევრი თამაზ მეჭიაურის აზრით, განცხადების შინაარსის მიხედვით, რომელიც აშშ-ს ელჩმა „რუსთავი2“-თან დაკავშირებით გააკეთა, ის სუვერენული ქვეყნის შიდა საქმეებში ერევა. როგორც დეპუტატი აცხადებს მეგობრობასაც აქვს ზღვარი და საჭიროა, რომ აშშ-ს საელჩომ ბოდიში მოიხადოს:

„თვით ამერიკის ელჩსაც კი არ აქვს უფლება ასე მკვეთრად ჩაერიოს სუვერენული ქვეყნის საქმეებში. თვით მეგობარსაც არ აქვს უფლება ასეთი ფორმით ჩაერიოს ჩემი ოჯახის საქმეებში. მეგობრობასაც აქვს ზღვარი, რომლის იქით თვითონაც არ უნდა გადავიდეს. მე არ ვეთანხმები აშშ-ს საელჩოს და ვფიქრობ ბოდიშიც უნდა მოიხადოს.“- განაცხადა თამაზ მეჭიაურმა.

შეგახსენებთ, რუსთავი 2-ის მმართველის შეცვლასთან დაკავშირებით, აშშ-ის საელჩომ განცხადება დღეს დილით გაავრცელა და ტელეკომპანიაში განვითარებულ მოვლენეს შემაშფოთებელი უწოდა.

"აშშ-ის საელჩო უაღრესად შეშფოთებულია რუსთავი 2-ის მართვასა და საკუთრებასთან დაკავშირებით შუა ღამეს განვითარებული მოვლენებით. სააპელაციო პროცესამდე არხის მმართველობის შეცვლის მცდელობას საფუძვლიანი პოლიტიკური შინაარსი აქვს. დემოკრატიულ საზოგადოებაში კრიტიკულ აზრს ხელი უნდა შეეწყოს და არა - მიჩუმდეს."- აღნიშნული იყო საელჩოს განცხადებაში.