ხელისუფლებამ და ივანიშვილმა ლახვარი ჩასცეს ქართულ სასამართლოს

ხელისუფლებამ და ივანიშვილმა ლახვარი ჩასცეს ქართულ სასამართლოს - "ახალი მემარჯვენეები"

პოლიტიკა - 13:59, 06 Nov, 2015

1512

„ახალი მემარჯვენეები“ „რუსთავი 2“-ის ირგვლივ განვითარებულ მოვლენებს განცხადებით ეხმაურება. მემარჯვენეები მიიჩნევენ, რომ რუსთავი 2-ის ირგვლივ მიმდინარე მოვლენები გასცდა სამართლებრივ ჩარჩოს და პროცესები პოლიტიკურ ჭრილში შევიდა, რომლის უკან დგას ხელისუფლება.

"ნიუპოსტი" ახალი მემარჯვენეების განცხადებას უცვლელად გთავაზობთ.

"სამწუხაროდ, რუსთავი 2–ის გარშემო მიმდინარე სამართლებრივი პროცესი გუშინდელი ღამის შემდეგ გადავიდა უკანა პლანზე და ნათელი გახდა, რომ ეს არის პოლიტიკური პროცესი, რომლის უკან დგას ხელისუფლება.

საკონსტიტუციო სასამართლოს გადაწყვეტილებამ თითქოს შეარბილა დაძაბულობა და გაჩნდა იმედი, რომ პროცესი არ გავიდოდა სამართლებრივი ჩარჩოდან, მაგრამ მოსამართლე ურთმელიძის უპრეცედენტო გადაწყვეტილებამ პრაქტიკულად შეუძლებელი გახადა მოვლენების ცივილიზებულად განვითარების შესაძლებლობა. ჩნდება საფუძვლიანი ეჭვი, რომ მოსამართლის გადაწყვეტილება შინაარსით და შედეგის თვალსაზრისით ეწინააღმდეგება საკონსტიტუციო სასამართლოს გადაწყვეტილებას.

დღეს ჩვენ აღმოვჩნდით სახელმწიფოში, სადაც ხელისუფლებამ და პირადად ბიძინა ივანიშვილმა ლახვარი ჩასცეს ქართულ სასამართლოს, რითაც მიზანმიმართულად საფრთხე შეუქმნეს ქვეყნის საგარეო კურსს და საქართველოს ხალხის ევროატლანტიკურ პერსპექტივას.

ამავდროულად ეს ნიშნავს, რომ ხელისუფლება ქვეყანას არ უტოვებს შანსს განვითარდეს დემოკრატიულად და ცდილობს დააბრუნოს იმ ეპოქაში, როცა ფეხქვეშ ითელებოდა ადამიანის ძირითადი უფლებები, მათ შორის უფლება, მიიღოს ინფორმაცია სხვადასხვა წყაროებიდან და თავისუფლად გამოხატოს საკუთარი აზრი. ფაქტია, რომ ხელისუფლება ვერ ეგუება მის მიმართ კრიტიკულად განწყობილი მედიასაშუალების არსებობას და მზად არის მასზე კონტროლის მოპოვებას შესწიროს ქვეყნის სტაბილური განვითარება .

ჩვენ, „ახალი მემარჯვენეები“ ვაცხადებთ, რომ ნაცმოძრაობის ხელისუფლებაში ყოფნის პირობებშიც ვიყავით; ახლაც, „ქართული ოცნების“ ხელისუფლებაში ყოფნის დროსაც ვართ და ყოველთვის ვიქნებით მედიის თავისუფლების პრინციპების დამცველი და ყველაფერს გავაკეთებთ, რომ ქვეყანამ დემოკრატიული განვითარების კურსს არ გადაუხვიოს.