"რუსთავი 2"-ის გენერალური დირექტორის ნიკა გვარამიას გათავისუფლებას შეერთებულ შტატებში გამოეხმაურნენ.

როგორც "კურიერთან" საუბრისას კონგრესის ბიბლიოთეკის წარმომადგენელმა, პოლ კრიგომ მოსამართლე ურთმელიძის გადაწყვეტილება უარყოფითად შეაფასა და აღნიშნა, რომ სახეზეა ტელევიზიის ხელში ჩაგდების მცდელობა.

კრიგო ვარაუდობს, რომ ამაზე სანქცია საქართველოს მთავრობამ გასცა.

"საკონსტიტუციო სასამართლომ ახლახანს მიიღო გადაწყვეტილება, რომ არაფერი არ უნდა მოხდეს, ვიდრე ყველა სააპელაციო პროცესი არ დასრულდება. მაგრამ ყველასთვის მოულოდნელად საქალაქო სასამართლოს მოსამართლე ურთმელიძე აცხადებს, რომ ნიშნავენ რუსთავი2-ის დროებით მმართველებს და ეს არის ტელევიზიის ხელში ჩაგდება. ჩანს, რომ ეს არის არა უბრალოდ ინდივიდუალური პირების მიერ ხელში ჩაგდება, არამედ მათ ამის გასაკეთებლად სანქცია მთავრობამ მისცა. მთავრობის უკან კი ბიძინა ივანიშვილი დგას. არაორდინალურია ამგვარი ოპერაციის ნახვა. ეს ყველაფერი კარგად დაგეგმილია და ვნახავთ, მომდევნო დღეებში რა მოხდება. როგორც ვიცი, ახლა თბილისში ღამეა და ადამიანები იკრიბებიან ტელევიზიის შენობასთან. ვნახოთ, როგორი იქნება ხალხის ნება. უახლოეს თვეებში არჩევნების გარეშე მათ არაფერი რჩებათ ქუჩაში გასვლის გარდა. ამ ორი ახალი მმართველის დანიშვნით კანონის უზენაესობა დაამსხვრიეს. ასეთი სისწრაფით სვლა საკონსტიტუციო სასამართლოს გადაწყვეტილების წინააღმდეგ არ უნდა იქნას დაშვებული," - განაცხადა კონგრესის ბიბლიოთეკის წარმომადგენელმა, პოლ კრიგომ.