არასამთავრობო სექტორი "რუსთავი 2"-ის გენერალური დირექტორის გათავისუფლებას განცხადებით ეხმაურებიან. მესამე სექტორის წარმომადგენლები მოუწოდებენ საერთაშორისო პარტნიორებს, რომ აღნიშნული საკითხი დაუყოვნებლივ დააყენონ საქართველოს მთავრობასთან.

„ეს გადაწყვეტილება ნათელს ხდის იმ ფაქტს, რომ ბოლო დროინდელი გამიზნული თავდასხმები რუსთავი2-ის წინააღმდეგ, რეალურად მიზნად ისახავს მაუწყებლის სარედაქციო პოლიტიკის ცვლილებას. ეს ფაქტი საკონსტიტუციო სასამართლოს გადაწყვეტილების გაბათილებას ისახავს მიზნად, რომლის ძალითაც საკონსტიტუციო სასამართლომ საქალაქო სასამართლოს ვერდიქტის დაუყოვნებლივი აღსრულება აკრძალა. რუსთავი 2-ის, როგორც კრიტიკული არხის შენარჩუნება ქართული დემოკრატიისთვის უმნიშვნელოვანესია, განსაკუთრებით 2016 წლის საპარლამენტო არჩევნების ფონზე,” - ნათქვამია განცხადებაში, რომელსაც ხელს აწერენ საერთაშორისო გამჭვირვალეობა - საქართველო, სამართლიანი არჩევნებისა და დემოკრატიის საერთაშორისო საზოგადოება, საქართველოს რეფორმების ასოციაცია, დემოკრატიული ინსტიტუტი, მედია განვითარების ფონდი, ეკონომიკური პოლიტიკის კვლევის ცენტრი, ატლანტიკური საბჭო, ბალტიისა და შავი ზღვის ალიანსი, სამოქალაქო განათლების ფონდი და სხვა.