საქართველოს პრეზიდენტმა გიორგი მარგველაშვილმა აზერბაიჯანელ კოლეგას თბილისში ვიზიტისთვის მადლობა გადაუხადა.

პრეზიდენტი ილჰამ ალიევთან შეხვედრას„უაღრესად მნიშვნელოვანს“ უწოდებს.

„ეს ვიზიტი ჩვენს ქვეყნებს შორის სტრატეგიული თანამშრომლობის გაღრმავების თვალსაზრისით უაღრესად მნიშვნელოვანია“- აღნიშნა მარგველაშვილმა ალიევთან ერთად გამართულ ერთობლივ პრესკონფერენციაზე.

პრეზიდენტის განცხადებით, 20 წლის წინ, ორ ერებს შორის, საფუძველი ჩაეყარა სტრატეგიულ თანამშრომლობას, რამაც ძალიან მნიშვნელოვანი როლი შესძინა აზერბაიჯანსა და საქართველოს და ასევე კავკასიის რეგიონს.

რაც შეეხება დღევანდელ შეხვედრის დეტალებს, მარგველაშვილის განცხადებით, საუბარი შეეხო სტრატეგიული თანამშრომლობის კიდევ უფრო გაღრმავების საკითხს.

„ვისაუბრეთ იმ ძალიან შორსმიმავალი გეგმების შესახებ და რომელიც გვაკავშირებს კასპიის ზღვასა და შავ ზღვას. ვისაუბრეთ სატრანსპორტო და ენერგეტიკული დერეფნის პროექტების გაღრმავების საკითხზეც", - განაცხადა საქართველოს პრეზიდენტმა და იქვე დასძინა, რომ „საქართველოსა და აზერბაიჯანის ურთიერთობები ნებისმიერი ტიპის გამოცდას გაუძლებს“.

გიორგი მარგველაშვილმა აზერბაიჯანთან გაფორმებულ დეკლარაციაზეც გაამახვილა ყურადღება.

პრეზიდენტი დარწმუნებულია, რომ ეს ერთობლივი დეკლარაცია ხელს შეუწყობს ერთობლივ თანამშრომლობას.

ამ კონტექტში ქვეყნის პირველმა პირმა უსაფრთხოების, სავაჭრო-ეკონომიკური, სატრანზიტო და კულტურული ურთიერთობები იგულისხმა.

"ჩვენი კეთილმეზობლურმა ურთიერთობამ სერიოზულ გამოცდებს გაუძლო. მახსენდება 2008 წელი, რუსეთის ოკუპაცია და აზერბაიჯანის ძალიან პრინციპული პოზიცია. მომავალშიც ჩვენი ურთიერთობა გაუძლებს ნებისმიერი ტიპის გამოცდას. ჩვენ მადლობელი ვართ არა მარტო პარტნიორობისთვის, რომელიც გვაკავშირებს აზერბაიჯანთან, არამედ მადლობელი ვართ იმ პროექტებისთვის, რომელსაც აზერბაიჯანი ახორციელებს საქართველოში. აზერბაიჯანის მიერ ხორციელდება საქართველოს ეკონომიკის სერიოზული მხარდაჭერა და მათ შორის ჰუმანიტარულ სფეროებში დახმარება. ნებისმიერმა ქართველმა იცის რა დახმარებას გვიწევენ ჩვენი პარტნიორები საბავშვო ბაღების, ეკლესიების, საგანმანათლებლო და სპორტული პროექტების განვითარების თვალსაზრისით. თავის მხრივ, ქართველი ხალხი იქნება ყოველთვის მოძმე აზერბაიჯანელი ხალხის გვერდით", - აღნიშნა გიორგი მარგველაშვილმა.