უმრავლესობის წევრი მანანა კობახიძე საკონსტიტუციო სასამართლოს განცხადებაში ფაქტობრივ უზუსტობებს ხედავს.

პარლამენტის ვიცე-სპიკერი ინტერესდება თუ რატომ არ მოუსმინა საკონსტიტუციო სასამართლომ მოპასუხე მხარეს პარლამენტს, როდესაც ტელეკომპანია „რუსთავი 2“-ის სარჩელი განიხილა.

„საკონსტიტუციო სასამართლო რამის ათწლეულების განმავლობაში ჩამოყალიბებულ პრაქტიკას არღვევს. გვიჩნდება ეჭვი, რომ ეს გადაწყვეტილება ნაკარნახევია გარკვეული პოლიტიკური მოტივებით. რატომ უდგებიან ასე თავგამოდებით ადვოკატად „რუსთავი 2“-ს მიჩენს ეჭვს, ხომ არ არის მანიპულაცია პოლიტიკური ძალისგან იმ ყველაფრის გათვალისწინებით რა კავშირებიც წლების განმავლობაში იყო საკონსტიტუციო სასამართლოს თავმჯდომარესა და „ნაციონალურ მოძრაობას“ შორის“, - განაცხადა კობახიძემ.

საკონსტიტუციო სასამართლომ დღეს გაავრცელა განცხადება, სადაც მანანა კობახიძე მცდარი ინფორმაციის გავრცელებაში დაადანაშაულეს. მათი ინფორმაციით, სასამართლო თითოეულ საქმეს იხილავს იმ ვადაში, რაც ობიექტურად აუცილებელია კონკრეტული საკითხის გადასაწყვეტად.

შეგახსენებთ, ამ შემთხვევაში საკონსტიტუციო სასამართლოში „რუსთავი 2“-ის მოპასუხე იყო პარლამენტი, რადგან „რუსთავი 2“ სწორედ საკანონმდებლო ორგანოს მიერ მიღებული კანონის მუხლის არაკონსტიტუციურად ითხოვდა.