"შეფასება ადეკვატურია" - აშშ-ის სახელმწიფო დეპარტამენტის პოზიციას უმრავლესობა იზიარებს

პოლიტიკა - 12:21, 05 Nov, 2015

2304

მედიის თავისუფლებასთან დაკავშირებით საპარლამენტო უმრავლესობის დამოკიდებულება აბსოლუტურად ემთხვევა აშშ-ის სახელმწიფო დეპარტამენტის დამოკიდებულებას.

ამის შესახებ უმრავლესობის დეპუტატმა ელისო ჩაფიძემ განაცხადა და აღნიშნა, რომ ქვეყანაში მედიის თავისუფლება მნიშვნელოვანია.

„ჩვენთვის მთავარია, რომ ჟურნალისტების სარედაქციო დამოუკიდებლობა იყოს დაცული და ეს არ იყოს გარკვეულწილად პოლიტიკურ და ქონებრივ დავებთან დაკავშირებული. ვფიქრობ, აშშ-ის სახელმწიფო დეპარტამენტის დამოკიდებულება ამ საკითხის მიმართ აბსოლუტურად ემთხვევა საპარლამენტო უმრავლესობის დამოკიდებულებას“, - ამბობს ჩაფიძემ.

თანაგუნდელს ეთანხმება ზვიად კვაჭანტირაძეც და ამბობს, რომ დეპარტამენტის შეფასება ადეკვატურია.

დეპუტატი ამბობს, რომ ქვეყანაში მედიის დამოუკიდებლობას საფრთხე არც ერთ შემთხვევაში არ უნდა შეექმნას.

„ჩემი აზრით შეფასება ადეკვატურია. ფაქტია, რომ საზოგადოება გამოცდილებიდან გამომდინარე დაღვინდა და ხედავს იმას, რომ ზედმეტი აჟიოტაჟის ატეხვა სამართლებრივ საკითხებზე, მითუმეტეს როდესაც პროცესი დასრულებული არ არის, არ ღირს. დაკვირვება არა მარტო ჩვენს მეგობრებს მართებთ, საზოგადოებას უნდა დააკვირდეს პროცესებს. ჩვენ ყველაფერი უნდა გავაკეთოთ, რომ მედიის დამოუკიდებლობას საფრთხე არ შეექმნას“, - განაცხადა კვაჭანტირაძემ.

"რუსთავი 2"-თან დაკავშირებით გამოტანილ განაჩენზე აშშ-ის სახელმწიფო დეპარტამენტი პირველ კომენტარს აკეთებს. ჯონ კირბის განცხადებით, ამერიკის შეერთებული შტატები რუსთავი 2-ის საქმის ყველა პროცესს დააკვირდება.