"რუსთავი 2"-თან დაკავშირებით გამოტანილ განაჩენზე აშშ-ის სახელმწიფო დეპარტამენტი პირველ კომენტარს აკეთებს.

ჯონ კირბის განცხადებით, ამერიკის შეერთებული შტატები რუსთავი 2-ის საქმის ყველა პროცესს დააკვირდება.

"დიდი ყურადღებით ვაკვირდებით რუსთავი 2-ის საქმის განხილვას. ჩვენ მონიტორინგს გავუწევთ ყველა სასამართლო პროცესს. აშშ მიესალმება მშვიდ და თავშეკავებულ რეაქციებს ყველა მხარის მხრიდან სასამართლოს მიერ გამოტანილ გადაწყვეტილებაზე. როგორც ძალიან ბევრჯერ აღგვინიშნავს და პირადად მე მითქვამს, მედიის თავისუფლება და სასამართლო სისტემის დამოუკიდებლობა უმნიშნელოვანესია ნებისმიერ დემოკრატიაში და გადამწყვეტია საქართველოს წარმატებული ევროატლანტიკური ინტეგრაციისთვის. ჩვენ ამ თემაზე ხშირად ვისაუბრებთ", - აღნიშნა სახელმწიფო დეპარტამენტის სპიკერმა.