რატომ გაუშვეს უწყებიდან ყველაზე წარმატებული მოხელე გიორგობიანი? - ელისაშვილი მერიისგან განმარტებებს ითხოვს

პოლიტიკა - 15:17, 04 Nov, 2015

5111

საკრებულოს დამოუკიდებელი დეპუტატი ალექსანდრე ელისაშვილი თბილისის მერიის განათლების, სპორტისა და ახალგაზრდულ საქმეთა საქალაქო სამსახურის უფროსიის - გიორგი არეშიძის გათავისუფლებას მიესალმება. რაც შეეხება ეკოლოგიისა და გამწვანების სამსახურის ხელმძღვანელის პოსტიდან ბიძინა გიორგობიანის გათავისუფლებას, მერიაში განხორციელებული აღნიშნული საკადრო ცვლილება ელისაშვილისთვის მოულოდნელი აღმოჩნდა.

როგორც, "ნიუპოსტთან" საუბრისას საკრებულოს დამოუკიდებელმა დეპუტატმა აღნიშნა, ბიძინა გიორგობიანი დაკისრებულ მოვალეობას წარმატებით ართმევდა თავს.
"კალაძის ცოლისძმის, გიორგი არეშიძის დანიშვნა მერიის განათლების, სპორტისა და ახალგაზრდულ საქმეთა საქალაქო სამსახურის უფროსიის თანამდებობაზე თავიდანვე დიდი შეცდომა იყო. არ შეიძლება 23 წლის ბიჭი, მით უფრო პოლიტიკური ლიდერის ცოლისძმის დანიშვნა არ შეიძლება. არეშიძე ამ საპასუხისმგებლო თანამდებობაზე ამდენხანსაც არ უნდა გაეჩერებინათ. რაც შეეხება ბიძინა გიორგობიანს, ის ბოლო დროს ძალიან კარგად მუშაობდა, ამას ძალინ გულახდილად ვამბობ. თქვენ იცით, რომ არც მისთვის დამიკლია კრიტიკა, თუმცა ბოლო პერიოდში აშკარა წინსვლა შეინიშნებოდა. სწორედ მისმა სამსახურმა დადო გარემოს დაცვის სტრატეგია. ეკოლოგიისა და გამწვანების სამსახური იყო შესანიშნავი და ერთადერთი სამსახური, რომელმაც მსგავსი გამართული და პროფესიონალური დოკუმენტი შეიმუშავა. გიორგობიანი ძალიან ადეკვატური იყო გამხმარ ხეებთან დაკავშირებითაც. ამ ყველაფრის გათვალისწინებით, ძალიან გამიკვირდა გიორგობიანის პოსტიდან გათავისუფლება" - უთხრა "ნიუპოსტს" დეპუტატმა.
კითხვაზე რა შეიძლება გამხდარიყო "ერთ-ერთი წარმატებული" მოხელის გათავისუფლების მიზეზი, ელისაშვილმა თქვა, რომ მასზე განმარტებები მერიამ უნდა გააკეთოს. "მოტივი ჩემთვისაც უცნობია" - აცხადებს ალეკო ელისაშვილი.
თბილისის მერიაში განხორციელებული საკადრო ცვლილებების შესახებ დედაქალაქის მთავრობის დღევანდელ სხდომაზე თბილისის მერმა დავით ნარმანიამ განაცხადა.
თანამდებობები დატოვეს სპორტისა და ახალგაზრდობის საქმეთა სამსახურის უფროსმა გიორგი არეშიძემ და ეკოლოგიისა და გამწვანების სამსახურის ხელმძღვანელმა ბიძინა გიორგობიანმა.