გიორგი არეშიძე შესაძლოა პროკურატურაში დაიბარონ - რა გახდა მერიის მაღალჩინოსნის გათავისუფლების მიზეზი?

პოლიტიკა - 12:46, 04 Nov, 2015

5593

„მედიატორის“ ხელმძღვანელი ლევან ხაბეიშვილი თბილისის მერიის განათლების, სპორტისა და ახალგაზრდულ საქმეთა საქალაქო სამსახურის უფროსიის - გიორგი არეშიძის გათავისუფლებას გადაუდებელ აუცილებლობას უწოდებს.

როგორც ხაბეიშვილმა "ნიუპოსტთან" საუბრისას აღნიშნა, "განათლების სამსახურის უფროსი თავად იყო გაუნათლებელი.

"არეშიძის გათავისუფლების მიზეზი იყო გადაუდებელი აუცილებლობა. ერთი თვე ჰქონდა მას იმისთვის, რომ საზოგადოებისთვის დაედასტურებინა, რომ აქვს უმაღლესი განათლების დიპლომი. მან ეს ვერ დაადასტურა. გამოდის, რომ თბილისში განათლების სამსახურის უფროსი იყო თავად გაუნათლებელი. ამავე დროს გიორგი არეშიძე შემჩნეული იყო კორუფციულ გარიგებებში. ვგულისხმობ, შაორში კვებასთან დაკავშირებულ ფაქტებს, ასევე მისი თანამშრომლისთვის გადარიცხული 10 ათასი ლარი. შემდეგ დადგინდა, რომ ეს თანამშრომელი იყო მისი მეგობარი. ჩვენ ამასთან დაკავშირებით პროკურატურაში შევიტანეთ განცხადება და დიდი იმედი გვაქვს გამოძიება დაიწება. ეს ადამიანი მინიმუმ უნდა დაიკითხოს და ახსნას ის უკანონობა, რაც ჩაიდინა. სხვა გამოსვალაი მედიაში აღარ იყო რომ არეშიძე დარჩენილიყო მერიაში" - აღნიშნა ხაბეიშვილმა.

„მედიატორის“ ხელმძღვანელი აცხადებს, რომ დედაქალაქის მთავრობაში კოლექტიური ნარმანიები მუშაობენ და სახეების ცვლილება უწყებაში ფუნდამენტალურად არაფერს შეცვლის.
"არ აქვს მნიშვნელობა ვის გაათავისუფლებენ, დედაქალაქის მთავრობაში კოლექტიური ნარმანიები არიან და სახელები არაფერს შეცვლის. სანამ თბილისის მერი იქნება დავით ნარმანია ვიქნებით საცობებში, იქნება გადათხრილი გზები, იქნება სატრანსპორტო კოლაფსი და იქნება ის მძიმე სიტუაცია, რაც დღეს დედაქალაქში"- უთხრა ხაბეიშვილმა "ნიუპოსტს".

მერიაში ბოლო პერიოდში რამდენიმე საკადრო ცვლილება განხორციელდა. თანამდებობები დატოვეს ზედამხედველობის სამსახურის უფროსმა გეგი ნიჟარაძემ, ასევე კეთილმოწყობის სამსახურის უფროსმა ავთანდილ სუდაძემ.