მართველი გუნდის პროექტი ისევ არაკონსტიტუციურია - NGO-ები საარჩევნო სისტემის რეფორმაზე

პოლიტიკა - 16:11, 02 Nov, 2015

741

კოალიცია „ქართულმა ოცნებამ“ არასამთავრობო ორგანიზაციებთან საარჩევნო სისტემის რეფორმის საკითხებზე შეხვედრა გამართა და მაჟორიტარული ოლქების დაყოფის მოდელის პრეზენტაცია წარმოადგინა.

პროექტის მიხედვით, მაჟორიტარულ არჩევნებთან დაკავშირებით არაფერი იცვლება.

მესამე სექტორის წარმომადგენლებს ხელისუფლებასთან იგივე შენიშვნები აქვთ და ამბობენ, რომ პროპორციულ სისტემაზე გადასვლა არა 2020 წელს, არამედ 2016 წელს უნდა მოხდეს.

მათი თქმით, მმართველი გუნდის მიერ შემოთავაზებული პროექტი არაკონსტიტუციურ შინაარს ინარჩუნებს.

„უფრო სწორი იქნება თუ პროპორციულ საარჩევნო სისტემაზე გადავალთ მომავალ არჩევბამდე და არა მომავალი არჩევნების შემდეგ. დიდი ალბათობით საკონსტიტუციო ცვლილება მხარდაჭერას ვერ მოიპოვებს პარლამენტში რაც იმას ნიშნავს, რომ მომავალ არჩევნებზეც ის საარჩევნო სისტემა გვექნება, რაზეც თანხმდება ყველა მხარე, რომ უსამართლოა“, - განაცხადა სამართლიანი არჩევნებისთვის“ აღამსარულებელმა დირექტორმა ნინო ლომჯაიამ.

არასამთავრობოების მოსაზრებას არ იზიარებს პარლამენტის თავმჯდომარე. მისი შეფასებით, საარჩევნო კანონმდებლობაზე მომუშავე ჯგუფის მიერ წარმოდგენილი მოდელი საერთაშორისო პრაქტიკასთან და საკონსტიტუციო სასამართლოს გადაწყვეტილებასთან შესაბამისობაშია.

„აქ იყო წარმოდგენილი ის მოდელი, თუ რომელ ოლქებში არის საჭირო კორექტივების შეტანა, მუნიციპალიტეტების დონეზე, სად რომელი მუნიციპალიტეტი შეიძლება გაერთიანდეს საარჩევნო ოლქის მიზნებისთვის და ასე შემდეგ. აგრეთვე, მაჟორიტარულ ოლქებში 50%-იანი ბარიერის შემოღება, როგორც სავალდებულო ზღურბლი წარმატებისთვის, აგრეთვე, სხვა ტექნიკური საკითხები. ამ თემაზე მსჯელობა გრძელდება, იქნება შეხვედრები პოლიტიკური პარტიების წარმომადგენლებთან, ჩვენ წინა კვირას გვქონდა შეხვედრა საერთაშორისო ორგანიზაციების წარმომადგენლებთან და ამის შემდეგ კანონპროექტის სახეს მიიღებს ალბათ, ეს კონცენფცია. შემდეგ გაიგზავნება ვენეციის კომისიაში და გაივლის ყველა სხვა პროცედურას. ასე რომ, ჩვენ გვინდა, დავიცვათ ის პირობა, რომ წლის ბოლომდე ამ საკითხში იყოს შეტანილი სიცხადე საკანონმდებლო დონეზეც“, - განაცხადა ჟურნალისტებთან საუბრისას დავით უსუფაშვილმა.