"თავდაცვის მინისტრი ჯარისკაცების ხმების გამოყენებას თამარ ხიდაშელის სასარგებლოდ ცდილობს"- ინაშვილი

პოლიტიკა - 16:59, 31 Oct, 2015

1805

"პატრიოტთა ალიანსიდან" საგარეჯოს მაჟორიტარობის კანდიდატი ირმა ინაშვილი აცხადებს, რომ ჩნდება ეჭვი, რომ თავდაცვის მინისტრი თინა ხიდაშელი ჯარისკაცების ხმების გამოყენებას ცდილობს საგარეჯოს მაჟორიტარობის კანდიდატის "ქართული ოცნებიდან" თამარ ხიდაშელის სასარგებლოდ.
"უჯარმაში, სადაც მუხროვანის სამხედრო ბაზაა, გახსნილია სპეცუბანი, სადაც ხმას ჯარისკაცები აძლევენ. 546 ჯარისკაციდან თავდაცვის სამინისტროს წარმომადგენლები გვარწმუნებდნენ, რომ მხოლოდ 25 იყო საგარეჯოელი. ჯარისკაცებს, რომლებიც მესტიიდან, ზუგდიდან და ბორჯომიდან არიან, თავად აქვთ კითხვები, რატომ მონაწილეობენ საგარეჯოს მაჟორიტარობის არჩევნებში. არ ვამბობთ, რომ სამხედროებმა არ უნდა მიიღონ მონაწილეობა არჩევნებში, მაგრამ ის, რომ ასე სწრაფად იცვლება დისლოკაციის ადგილი და ჯარისკაცების რაოდენობა, ეს პირდაპირ აჩენს ეჭვის საფუძველს, რომ თავდაცვის მინისტრ თინა ხიდაშელს, რომელიც ისედაც აქტიურად იყო ჩართული საარჩევნო პროცესში, მიზნად აქვს დასახული ჯარისკაცების ხმების გამოყენება მათი კანდიდატის მხარდასაჭერად" - განაცხადა ირმა ინაშვილმა.

მისი თქმით, "საგარეჯოში ხდება იგივე, რასაც აკეთებდა მიხეილ სააკაშვილი".