"სააკაშვილს სურს დაიღვაროს სისხლი" - სოზარ სუბარი ფარულ აუდიოჩანაწერებს ეხმაურება

პოლიტიკა - 14:00, 31 Oct, 2015

1451

დევნილთა მინისტრი სოზარ სუბარი იმ ჩანაწერებს ეხმაურება, რომელიც ინტერნეტში გავრცელდა და სადაც საქართველოს ყოფილი პრეზიდენტი მიხეილ სააკაშვილი ტელეკომპანია "რუსთავი 2"-ის გენერალურ დირექტორს, ნიკა გვარამიას და "ნაციონალური მოძრაობის" საერთაშორისო მდივანს გიგა ბოკერიას ესაუბრება.
სუბარის თქმით, საქართველოს მესამე პრეზიდენტს "საქართველო და ზოგადად ადამიანი თავისი კარიერისთვის უნდოდა".
"ეს ყველამ კარგად ვიცოდით სააკაშვილის ზრახვები, თუ ვინმემ აქამდე არ იცოდა, ის ახლაც ვერ გაიგებს ვერაფერს ამ დიალოგიდან, რადგან ისინი არიან მიშა სააკაშვილის სექტის წევრები და ისინი ვერასდროს ვერაფერს გაიგებენ. დანარჩენებისთვის ყველაფერი ნათელი იყო აქამდე და ნათელია დღემდე. ამ ადამიანს უნდა, რომ დაიღვაროს სისხლი იმისთვის, რომ ამით საფუძველი შეიქმნას მისი ქვეყანაში დაბრუნების, მაგრამ ეს არ მოხდება და ვერ მოხდება და ეს ნათლად თქვა ქართველმა ხალხმა ჯერ კიდევ 2012 წლის ოქტომბერში", - განაცხადა სოზარ სუბარმა.
რაც შეეხება სისხლის სამართლის საქმეს, მინისტრის თქმით, ამას გამოძიება დაადგენს, ვინ არის დამნაშავე, რა დანაშაულთან გვაქვს საქმე და რა შედეგები უნდა მოჰყვეს.