"მარტვილში ხმის მისაცემად მეზობელი რაიონებიდან ხალხი ჩაჰყავთ, ადგილი აქვს მოსყიდვას"

"მარტვილში ხმის მისაცემად მეზობელი რაიონებიდან ხალხი ჩაჰყავთ, ადგილი აქვს მოსყიდვას" - ადა მარშანია

პოლიტიკა - 11:31, 31 Oct, 2015

1121

მარტვილში მაჟორიტარობის კანდიდატებმა საკუთარი არჩევანი უკვე გააკეთეს. "პატრიოტთა ალიანსის"კანდიდატმა ეთერ მეძველიამ ხმა ნომერ პირველ საარჩევნო უბანზე მისცა.
რაც შეეხება "ქართული ოცნების" კანდიდატ სოსო დანელიას. მან ხმა სოფელ გაჭედილში, მე- 11 საარჩევნო უბანზე მისცა.
სოსო დანელიამ დღეს "პატრიოტთა" ალიანსის" კანდიდატის, ეთერ მეძველიას საარჩევნო შტაბის განცხადებებსაც უპასუხა, რომლის მიხედვითაც არჩევნების პროცესში სერიოზული დარღვევები იკვეთება და აღნიშნა, რომ ეს "აბსურდია".

სანამ მაჟორიტარობის კანდიდატებმა საკუთარი არჩევანი გააკეთეს, მარტვილში მცირე ინცინდენტებს ჰქონდა ადგილი. კერძოდ, მარტვილის სოფელ ონოღიაში საარჩევნო უბანი დაგვიანებით გაიხსნა.
#65-ე საოლქო საარჩევნო კომისიის თავმჯდომარე გრიგოლ ბართაია აცხადებს, რომ მიზეზი მარკირების სისტემის აუმუშავებლობის გახდა.
ინცინდენტი იყო #37-ე საუბნო საარჩევნო უბანზე, სადაც ერთ-ერთმა ამომრჩეველმა უარი თქვა მარკირების გავლაზე და მიზეზად რელიგიური მრწამსი დაასახელა. საბოლოო ჯამში აღნიშნულმა მამაკაცმა "საყვარელ კანდიდატს", მარკირება გავლილმა მაინც მისცა ხმა.

მარტვილში იმყოფება "პატრიოტთა ალიანსის" ერთ-ერთი ლიდერი ადა მარშანია. მან ჟურნალისტებთან თქვა, რომ მარტვილში ხმის მისაცემად მეზობელი რაიონებიდან ხალხი ჩაჰყავთ.

აღსანიშვანია, რომ მარშანია სასტუმროდან შტაბამდე ხატით ხელში მივიდა.
"რიგ სოფლებში დაიწყო ფულის დარიგება და მოსახლეობის მოსყიდვა" - აღნიშნა მან.
საგარეჯოსა და მარტვილში დღეს მაჟორიტარული საარჩევნო სისტემით პარლამენტის შუალედური არჩევნები ტარდება.

აღნიშნულ ოლქებში არჩევნები ძირითადი ოპოზიციური პარტიების ბოიკოტის ფონზე მიმდინარეობს. შედეგად, 2016 წლის არჩევნებამდე ერთი წლით ადრე, საქართველოს საკანონმდებლო ორგანოს 2 ახალი მაჟორიტარი დეპუტატი შეემატება. ორივე ოლქში მთავარი კონკურენტები მმართველი გუნდისა და პატრიოტთა ალიანსის კანდიდატები არიან.