„რუსთავი2“-ის გარშემო მიმდინარე პროცესებზე და მედიაში გავრცელებულ ფარულ ჩანაწერებთან დაკავშირებით კომენტარი პარლამენტის თავმჯდომარემ გააკეთა. დავით უსუფაშვილის თქმით მის გაოცებას იწვევს ის ფაქტი, რომ შექმნილი ვითარების ფონზე არანაირ აქტიურობას არ იჩენენ ძმები ყარამანიშვილები, რომლებსაც "რ2"-თან დაკავშირებული სასამართლო დავა კონკრეტულად ეხებათ. ამასთანავე პარლამენტის სპიკერმა გავრცელებულ ფარულ ჩანაწერებზეც ისაუბრა და აღნიშნა, რომ მისთვის ასევე კითხვებს აჩენს ჩანაწერის გავრცელების შემდეგ ენმ-ს წევრების მიერ გაკეთებული კომენტარები, უსუფაშვილის თქმით რჩება შთაბეჭდილება, რომ სააკაშვილს მისი პარტია აღარ ემორჩილება.

„გუშინ გავრცელებულ ჩანაწერებს ემიჯნება ყველა, გარდა მიხეილ სააკაშვილისა. ყველა ამბობს, ჩვენ არაფერს არ ვგეგმავდითო. არ ვიცი, ესე იგი მხოლოდ სააკაშვილი გეგმავდა რაღაცას და მისი პარტია აღარ ემორჩილება?! არ ვიცი, ეს როგორ არის. ამ საქმის პოლიტიკური მხარე სრულიად ნათელია. ამ ყველაფერში მნიშვნელოვანია, რომ მედია არ დაზარალდეს. რა მიმართულებითაც არ უნდა იყურებოდეს "რუსთავი 2", რა ღირებულებებსაც არ უნდა აღიარებდნენ მისი ხელმძღვანელები თუ ჟურნალისტები, მათ აქვთ უფლება, იმუშაონ.
პირველ რიგში მაოცებს ის, რომ ამ თემაზე ყველა საუბრობს, გარდა იმ ხალხისა, ვისაც საკითხი ეხება. დავა კონკრეტულად ამ არხის მეპატრონეებთან, მათი კომპანიის თუ ქონების თაობაზეა. ვიღაცეები მას იცავენ, ვიღაცეები ბარიკადების აშენებას აპირებენ, ვიღაცეები პოზიციებს სხავანაირად გამოხატავენ. პირველ რიგში მაინტერესებს, ეს ხალხი არსებობს ბუნებაში, ისინი რეალურად ამ ტელევიზიის პატრონები არიან, თუ აღარ არსებობენ და უარი აქვთ ნათქვამი?! თუ ასეა, მაშინ სამართლებრივადაც და პოლიტიკურადაც სხვა სურათი და ვითარება გვექნება. ყველა რაღაცას ლაპარაკობს, რაღაცას ცდილობს - დაცვას თუ პოზიციების სხვა ფორმებით გამოხატვას, გარდა იმ ხალხისა, ვისაც ეს ეხება. ამ ყველაფერში ყველაზე საინტერესო ესაა. დანარჩენი ამ პროცესიდან, ვინ რა სარგებელის გამონახვას ცდილობს, ეს სხვა თემაა. კიდევ სხვა თემაა შესაძლო კანონდარღვევები, რომელიც შეიძლება გამოიკვეთოს და ეს სამართალდამცავების საქმეა", - განაცხადა დავით უსუფაშვილმა