მაინტერესებს ჩვენი პარტნიორების შეფასებები მარად აღშფოთებულ-შეშფოთებულები რომ იყვნენ

მაინტერესებს ჩვენი პარტნიორების შეფასებები მარად აღშფოთებულ-შეშფოთებულები რომ იყვნენ - მეჭიაური

პოლიტიკა - 16:43, 30 Oct, 2015

1786

დეპუტატი თამაზ მეჭიაური გუშინ გავრცელებულ ფარულ ჩანაწერებზე გამოძიების დაწყებას მოითხოვს. "ქართული ოცნების" წევრი საერთაშორისო და არასამთავრობო ორგანიზაციებსაც მიმართავს და ინტერესდება რა შეფასებას მისცემენ ისინი ჩანაწერში გაჟღერებულ მოსაზრებებს.
"საერთაშორისო და არასამთავრობო ორგანიზაციები, რომლებიც ირიბად ნათქვამ სიტყვასაც კი არ შეარჩენდნენ, დღეს, როდესაც პირდაპირ მოწოდებებია სისხლის ღვრისკენ, მაინტერესებს, რას იტყვიან ისინი - არიან ქვეყნის მეგობრები, თუ არიან ერთი პოლიტიკური ჯგუფის, რომელიც აშკარად ჩანს, რომ დანაშაულის ნიშნების მატარებლები არიან"- ამბობს დეპუტატი.
მეჭუარი საქმის აღძვრის მომხრეა.
"საქმე აღძრულიც უნდა იყოს იმდენად, რამდენადაც ინტელექტუალური მხარდაჭერისა და თითიდან გამოწოვილი ბრალდებების საფუძველზე აღნიშნული პირები ახდენდნენ ქალბატონი კვიციანის, თუ ბატონი ირაკლი ბათიაშივილის და კიდევ უამრავი ადამიანის დაპატიმრებას. სხვათაშორის, დღეს საკუთარი მხარდამჭერიც გამოაცხადეს მოღალატეებად მხოლოდ იმის გამო, რომ რუსეთის საელჩოსთან შეხვედრაზე დაინახეს, სადღაც ქუჩაში ელაპარაკებოდნენ ერთმანეთს. იგივე ხალხი, პირდაპირ სისხლისღვრისკენ მოუწოდებენ ამ ჩანაწერების მიხედვით და ფაქტიურად არც უარყოფენ. აქედან გამომდინარე, უნდა იყოს გამოძიებული ვინ იყო კიდევ ამაში ჩართული, ვინ უმაგრებდა ზურგს თუნდაც გარედან" - დასძინა მან.