,,ედპ“ რ2-თან დაკავშირებულ პროცესებს და ფარულ ჩანაწერებს საგანგებო განცხადებით ეხმაურება

პოლიტიკა - 16:14, 30 Oct, 2015

3103

სამაუწყებლო კომპანია რუსთავი 2-თან დაკავშირებულ პროცესებს და ფარულ აუდიო ჩანაწერებს ეროვნულ-დემოკრატიული პარტია სპეციალური განცხადებით ეხმაურება. როგორც ედპ-ს პოლიტიკურმა მდივანმა გოგა გოგნიაშვილმა დღეს პარტიის ოფისში საგანგებოდ გამართულ ბრიფინგზე განაცხადა, ედპ მხარდაჭერას უცხადებს რუთავი 2-ს და ცალსახად ემიჯნება ყველანაირი სახის ძალადობას. ამასთან, ეროვნულ-დემოკრატები მიიჩნევენ, რომ ხელისუფლების მხრიდან გაკეთებული განცხადებები ეჭვს აჩენს, რომ ქვეყანაში გრძელდება უკანონო მოსმენები და მათი გამოყენება ოპონენტების წინააღმდეგ.

,,უკანასკნელ ხანს საქართველოში არსებული პოლიტიკური ვითარება ცხადყოფს, რომ ქვეყანა პოლიტიკური კრიზისის ზღვარზეა. მედიასაშუალებების ირგვლივ მიმდინარე მოვლენები - მაღალრეტინგული თოქშოუების დახურვა, ერთ-ერთი გავლენიანი ტელეკომპანიის „რუსთავი 2-ის“ წინააღმდეგ მიმართული პროცესები, ტელეკომპანიის გენერალური დირექტორის მიმართ განხორციელებული შანტაჟი, კითხვის ნიშნის ქვეშ აყენებს ქვეყანაში დემოკრატიის იმ მთავარ ღირებულებას, როგორიცაა სიტყვისა და თავისუფალი აზრის გამოხატვის უფლება. ეს ყველაფერი კი, საბოლოო ჯამში, კატასტროფული შედეგებით მოუბრუნდება ქართულ სახელმწიფოს.

ეროვნულ-დემოკრატიული პარტია, კიდევ ერთხელ აცხადებს, რომ ჩვენ მხარდაჭერას ვუცხადებთ ტელეკომპანია რუსთავი 2-ს, როგორც განსხვავებული აზრის გამომხატველ მედიას და ამასთან, ცალსახად ვემიჯნებით ნებსმიერი მხრიდან განხორციელებულ ძალადობას, რომელიც ისევ და ისევ ზიანს მიაყენებს როგორც მთლიანად მედიასივრცეს, ასევე საქართველოს მომავალს.

გარდა ამისა, დღეს ხელისუფლების წარმომადგენელთა მხრიდან გაკეთებული განცხადებები, აჩენს ეჭვს, რომ ქვეყანაში გრძელდება უკანონო მოსმენები და მათი გამოყენება ოპონენტების წინააღმდეგ.

ეროვნულ-დემოკრატიული პარტია მოუწოდებს პოლიტიკურ პარტიებს, არასამთავრობო ორგანიზაციებს, გადავდგათ ქმედითი ნაბიჯები, მოვლენების შემდგომი ესკალაციის თავიდან აცილების მიზნით“ - ნათქვამია ედპ-ს განცხადებაში.