ენმ საჯაროდ აცხადებდა, რომ რ2-ის აღების მცდელობას, ჩვენ ფიზიკურად აღვუდგებით წინ- ბოკერია

პოლიტიკა - 15:20, 30 Oct, 2015

2163

„ნაციონალური მოძრაობის“ საგარეო მდივანმა სახელმწიფო უსაფრთხოების სამსახურში დაკითხვაზე შესვლამდე ჟურნალისტებთან კომენტარი გააკეთა და იმ ფარულ ჩანაწერებთან დაკავშირებით ისაუბრა, რომელიც მედიაში გავრცელდა და რომელშიც მისი, მიხეილ სააკაშვილის და ნიკა გვარამიას საუბარია ასახული. გიგა ბოკერიას თქმით, ენმ-ს პოზიცია „რუსთავი ორის“ ფიზიკურ დაცვასთან დაკავშირებით, თავიდანვე ცნობილი იყო და ამ მხრივ ჩანაწერებში სიახლე არ ყოფილა.

„ნაციონალური მოძრაობა საჯაროდ აცხადებდა და ამ საკითხთან დაკავშირებით მოგეხსენებათ ბრიფინგიც ჩავატარეთ , რომ ძალით „რუსთავი ორის“ აღების მცდელობას, ჩვენ წინ აღვუდგებით ფიზიკურად ჩვენი მანიფესტაციით. ეს ცნობილი იყო ყველასთვის დიდი ხანია და ეს პოზიცია არის დღესაც ძალაში. დიდი ხანია გვაქვს საუბარი იმაზე, როგორ დავიცავთ ჩვენ თავისუფლებას, როგორ შევუშლით ხელს ხელისუფლებას , კონსტიტუციის დარღვევით, სასამართლოზე ძალადობის მეშვეობით "რუსთავი 2"-ის ხელში ჩაგდების მცდელობის შემთხვევაში. ამ დისკუსიისას ამ შენობის დაცვის ყველა ვარიანტი განიხილება. ეს არის ჩვენი უფლება. რაც შეეხება ბოევიკებს, მემგონი ყველა საღი აზრის მქონესთვის ნათელია, რომ აქ შეიარაღებულ ხალხზე კი არ არის ლაპარაკი, ლაპარაკია, რომ ჩვენ უნდა შეგვეძლოს წინააღმდეგობა გავუწიოთ ჩვენი მანიფესტაციით იმ მცდელობას, რომელსაც გეგმავს ივანიშვილი და რომელსაც იმედი მაქვს, რომ გადაიფიქრებს. "რუსთავი2"-ის და მისი ჟურნალისტების უფლებაა თვითონ განსაზღვრონ როგორ დაიცავენ თავის ტერიტორიას, ჩვენი საქართველოს მოქალაქეების უფლება და ვალდებულებაა და ეს არაა რ2-ის ჟურნალისტების გადასაწყვეტი, რომ ხელი შევუშალოთ ივანიშვილს ჩაახშოს ქვეყანაში ის ინსტიტუტები, რომელიც ანტიკონსტიტუციურად ხელისუფლების შენარჩუნებაში ხელს უშლის. ჟურნალისტების გადასაწყვეტი არაა, ჩვენ როგორ შევუშლით ხელს ასეთ ანტიკონსტიტუციურ ქმედებაში.“- განაცხადა გიგა ბოკერიამ.