„რუსთავი2“-ის გენერალურმა დირექტორმა მიმდინარე პროცესებთან დაკავშირებით საგანგებო ბრიფინგი გამართა. ნიკა გვარამიას განცხადებით, ქვეყანაში გამწვავებულ პროცესებზე პასუხისმგებლობა ხელისუფლებას ეკისრება, რომელმაც ყველაფერი გააკეთა იმისთვის, რომ „რუსთავი2“ საუბარი საკუთარი დაცვაზე დაეწყო. ტელეკომპანიის გენდირექტორის თქმით, „რუსთავი2“ არ ფიქრობს რევოლუციურ სცენარებზე, ტელეკომპანიის ინტერესი არა მთავრობის შეცვლა, არამედ თავისუფლად მაუწყებლობა და პროცესების იმგვარად გაშუქებაა, როგორც ტელეკომპანია მიიჩნევს საჭიროდ. გვარამიას თქმით, ხელისუფლება წითელ ხაზს გადაცდა და პრემიერის დაპირება, რომ უსაფრთხოება დაცული იქნება სარწმუნო არაა.

გვარამიას განცხადებით ტელეკომპანიის თანამშრომლები თავისი ძალით დაიცავენ ტელევიზიას.

"პრემიერი დაგვპირდა, რომ ჩვენი უსაფრთხოება დაცული იქნება, მისი სიტყვები სარწმუნო არ არის, რადგან ის ხშირად ცრუობს. ამიტომ ჩვენ დღეიდან ვიღებთ გადაწყვეტილებას - ჩვენ თვითონ დავიცავთ კომპანიას, ჩვენ ვიხსნით პასუხისმგებლობას ჩვენს დასაცავად მოსული ადამიანების უსაფრთხოებაზე. ვერავის მივცემთ გარანტიას, რომ აქ შემოსული ადამიანებიდან, ვინმე არ იქნება პროვოკატორი. არ გამოვრიცხავთ, რომ ასეთი პროვოკატორები ჩვენს შიგნითაც არსებობდნენ. ძალიან დიდი მნიშვნელობის და წონის საკითხია სასწოზე. თუ დასაცავი გახდება კომპანია ჩვენი ძალებით გავაკეთებთ. თუ ვინმეს ესვრიან, გვესროლონ ჩვენ", - აღნიშნა გვარამიამ.