პრეზიდენტით უკმაყოფილო ნიკოლაიშვილი და დაძაბულობის ხელოვნურად გაზრდაზე საუბრობს

პოლიტიკა - 16:25, 29 Oct, 2015

1538

არასამთავრობო ორგანიზაციების მოთხოვნით დღეს პრეზიდენტის სასახლეში გიორგი მარგველაშვილთან შეხვედრა გაიმართა. რამდენიმე არასამთავრობო ორგანიზაცია პრეზიდენტის მიერ რამდენიმე დღის წინ გაკეთებულ განცხადებას არ ეთანხმება. შეხვედრის მთავარი თემა სწორედ ქვეყანაში კონსტიტუციური წესრიგის დარღვევის საფრთხესთან დაკავშირებით პრეზიდენტის განცხადება და „რუსთავი2“-ის საქმის ირგვლივ განვითარებული პროცესები იყო.

ქვეყანაში სიტუაციის კონსტიტუციური ჩარჩოებიდან გადასვლის საფრთხის შესახებ პრეზიდენტის განცხადებას არ ეთანხმება ადვოკატი გელა ნიკოლაიშვილი. როგოც ნიკოლაიშვილი აცხადებს, თუ დაძაბულობა ხელოვნურად თუ არ იქნება მასშტაბებში გაზრდილი, სიღრმეებში წასვლის არანაირი საფუძველი არ არსებობს:

„ვფიქრობ, რომ ეს დაძაბულობა ხელოვნურად თუ არ იქნება მასშტაბებში გაზრდილი, სიღრმეებში წასვლის არანაირი საფუძველი არ არსებობს. მით უმეტეს, ამ ეტაპზე, როდესაც ჯერ კიდევ პირველი ინსტანციის სასამართლოს გადაწყვეტილება არ გამოუტანია.

სულ არ გამიკვირდება, რომ პირველი ინსტანციის სასამართლომ მიიღოს გადაწყვეტილება „რუსთავი 2“-ის დღევანდელი ხელმძღვანელობის სასარგებლოდ. როდესაც ბოლო დღეებში საზოგადოებისთვის საჯარო გახდა მხოლოდ სამართლებრივი საფუძვლები, რაზე დაობენ.

აქამდე იყო მხოლოდ პოლიტიკური მხარე. ახლა გავიგეთ, რომ თურმე არსებობს რაღაც ექსპერტიზის დასკვნა, რას ემყარება და ა.შ. ამაზე უნდა მიმდინარეობდეს სასამართლოში დავა და არა ის, რომ თუ მიიღებს „რუსთავი 2“-ის სასარგებლო გადაწყვეტილებას, არხის ხელმძღვანელობამ თქვას, რომ აი, ჩვენ გავიმარჯვეთ იმიტომ, რომ ზეწოლას ჰქონდა ადგილი, საზოგადოებამ დაგვიჭირა მხარი და მეორე მხრივ, თუ მათ საწინააღმდეგოდ მიიღებს გადაწყვეტილებას, მაშინ თქვან, რომ აი, ხომ ვამბობდით, ჩვენს საწინააღმდეგოდ მიიღებდაო.

ეს დავა დღეს და ხვალ არ წყდება. ამას ნებისმიერი მხარე, წაგებული თუ მოგებული, სააპელაციო სასამართლოში გაასაჩივრებს, შემდეგ - უზენაესში. ასე რომ, თვეების კი არა, შეიძლება წლების დავა იყოს. მაგრამ დაუყოვნებლივი აღსრულება ალბათ არ მოხდება და არც უნდა მოხდეს“, - განაცხადა გელა ნიკოლაიშვილმა.