პრემიერის ხელმძღვანელობით ინვესტორთა საბჭოს პირველი სხდომა იმართება

პოლიტიკა - 16:09, 29 Oct, 2015

1078

მთავრობის ადმინისტრაციაში საქართველოს პრემიერ-მინისტრ ირაკლი ღარიბაშვილის ხელმძღვანელობით, ინვესტორთა საბჭოს პირველი სხდომა იმართება.

მთავრობის წევრებმა, ადგილობრივი ბიზნესასოციაციებისა და საერთაშორისო საფინანსო ინსტიტუტების წარმომადგენლებმა ბიზნესგარემოზე გავლენის მქონე ძირითადი გამოწვევები და კერძო სექტორის განვითარების შემდგომი ხელშეწყობის გზები უნდა განიხილონ.

როგორც შეხვედრის დაწყებისას პრემიერ-მინისტრმა ირაკლი ღარიბაშვილმა განაცხადა, EBRD-ის დახმარებით, მთავრობამ საინვესტიციო საბჭო შექმნა. პრემიერს მიაჩნია, რომ ეს არის წინგადადგმული ნაბიჯი, რომელიც დაეხმარება მთავრობას, ასევე, ინვესტორებს, ბიზნესმენებს, არასამთავრობო სექტორს, რომ გაცვალონ იდეები, მოსაზრებები და გააუმჯობესონ საქართველოში არსებული საინვესტიციო გარემო.

„ჩვენ ვიქნებით მაქსიმალურად ღია, რომ მოვისმინოთ თქვენგან მოსაზრებები, კრიტიკული შენიშვნები. ჩვენი მთავარი ამოცანა იქნება, რომ კიდევ უფრო მეტად ხელსაყრელი და მიმზიდველი გახდეს, საქართველოში ბიზნესგარემო“, - განაცხადა ირაკლი ღარიბაშვილმა.

ასევე, დღევანდელი შეხვედრის შესახებ, კომენტარი გააკეთა ეკონომიკის მინისტრმა დიმიტრი ქუმსიშვილმა.

მისი თქმით, ინვესტორთა საბჭო ეს არის პლატფორმა, სადაც საერთაშორისო საფინანსო ინსტიტუტები, ბიზნესსექტორი და ასევე, მთავრობა ერთად განიხილავენ იმ მნიშვნელოვან საკითხებს, რომლებიც უნდა დაეხმაროს ქვეყანას, საინვესტიციო მიმზიდველობის გაზრდაში, ინვესტიციების მოზიდვასა და უკეთესი ბიზნესგარემოს შექმნაში.

როგორც ეკონომიკის მინისტრმა განმარტა, დღეს რამდენიმე მნიშვნელოვანი საკითხია განსახილველი, მათ შორის საპენსიო რეფორმის მიმართულება, სადაც ქუმსიშვილის თქმით, მსოფლიო ბანკი და აზიის განვითარების ბანკი გააკეთებენ თავიანთ მოხსენებებს.

ინვესტორთა საბჭო 2015 წლის მაისში დაარსდა, როდესაც საქართველოს პრემიერ-მინისტრმა და ევროპის რეკონსტრუქციისა და განვითარების ბანკის პრეზიდენტმა, სხვა დამფუძნებელ წევრებთან ერთად ხელი მოაწერეს ურთიერთგაგების მემორანდუმს.

საბჭოს შემადგენლობაში შედიან ეკონომიკური პროფილის მინისტრები, საქართველოს ბიზნესასოციაციის წარმომადგენელი, ამერიკის სავაჭრო პალატის წარმომადგენელი, ევროკავშირის, საქართველოს ბიზნესსაბჭოს წარმომადგენელი და სხვები.

დღევანდელ სხდომაზე ტექნიკურ საკითხებთან დაკავშირებით იმსჯელებენ.