სომხეთის უარმა აფხაზეთის დე ფაქტო ხელისუფლება გაანაწყენა

პოლიტიკა - 15:25, 29 Oct, 2015

11702

ოკუპირებული აფხაზეთის დე ფაქტო საგარეო საქმეთა სამინისტრო სომხეთში გამართული საერთაშორისო ტურნირიდან აფხაზი სპორტსმენების მოხსნის ფაქტის გამო შეშფოთებას გამოთქვამს. როგორც დე ფაქტო სამინისტროს ოფიციალურ განცხადებაშია ნათვამი, „უწყება გმობს საქართველოს განუწყვეტლივ მცდელობებს უარყოფითად იმოქმედოს აფხაზეთის კონტაქტებზე და აღნიშნული ქმედებას აფხაზეთის გარესამყაროსგან იზოლაციად აფასებს.“

აფხაზური მხრის განცხადებით სპორტსმენებს შეჯიბრში მონაწილეობა საქართველოს საელჩოს ჩარევის შედეგად აუკრძალეს.

„ღრმა მწუხარებით უნდა აღინიშნოს, რომ ეს ფაქტი სომხეთში მოხდა - ქვეყანაში, რომელსაც აფხაზეთი მეგობრულ სახელმწიფოდ განიხილავს იმის გათვალისწინებით, რომ აფხაზეთში დიდი სომხური დიასპორაა, მთიანი ყარაბაღის რესპუბლიკასთან კი შესანიშნავი ურთიერთობა გვაქვს. სომხეთის ხელისუფლების და ტურნირის ორგანიზატორების გადაწყვეტილება რთული გასამართლებელია.“ - ნათქვამია განცხადებაში.

განცხადებაში ასევე აღნიშნულია, რომ მომხდარ ფაქტ ჟენევის დისკუსიის მორიგ შეხვედრაზე ისაუბრებენ, რომელიც დეკემბერშია დაგეგმილი.

თავისუფალ ჭიდაობაში ტურნირი სომხეთის დედაქალაქში 21-23 ოქტომბერს ჩატარდა და მასში საქართველოს, ირანის, დაღესტანის, ინგუშეთის, ჩრდილოეთ ოსეთის, აზერბაიჯანისა და უკრაინის სპორტსმენები იღებდნენ მონაწილეობას. აფხაზეთის დე ფაქტო რესპუბლიკის თავისუფალი ჭიდაობის სექციის მთავარი ტრენერის, იგორ ბერაიას განცხადებით, მათ დელეგაციას კარგად დახვდნენ, თუმცა მოგვიანებით უთხრეს, რომ „აფხაზეთის რესპუბლიკა“ ტურნირიდან მოხსნილია, როგორც გაარკვიეს, სომხეთში საქართველოს საელჩოს ძალისხმევის შედეგად.