ენერგეტიკის მინისტრის კახი კალაძის თქმით, „სოკარს“ დამატებითი კომერციული მოცულობის შემოტანის შესაძლებლობა არ გააჩნია, რის გამოც მიმდინარეობს მოლაპარაკებები "გაზპრომთან".

ამის შესახებ კალაძემ ჟურნალისტებთან საუბრისას განაცხადა.

"სოკარს" პრობლემა არ აქვს მიაწოდოს ბუნებრივი აირი მოსახლეობას და უზრუნველყოს სრულიად. რაც შეეხება დამატებით კომერციულ მოცულობებს, გასული წლების განმავლობაშიც შემოგქონდა დამატებითი კომერციული გაზი რუსეთიდან, იმიტომ რომ "სოკარს" არ ჰქონდა ამის შესაძლებლობა", - განაცხადა კალაძემ.

რაც შეეხება მილანში „გაზპრომის“ წარმომადგენლებთან შეხვედრას, კალაძის თქმით, დეტალებზე შეთანხმება ამ ეტაპზე მიღწეული არ არის.

„საუბარია ტრანზიტის მოცულობის გაზრდაზე. ჩვენ გვინდა მეტი შემოსავალი მივიღოთ და დამატებით მივცეთ შესაძლებლობა კომერციულ სტრუქტურებს, შემოიტანონ ბუნებრივი აირი საქართველოს გავლით", - განაცხადა კალაძემ.